Հարյուրավոր մարդիկ են դուրս եկել կիրակի Թունիսի մայրաքաղաքի փողոցներ՝ պահանջելով ազատ արձակել երկրի նախագահ Կաիս Սաիդի շուրջ 20 ընդդիմախոսների, որոնք ձերբակալվել են փետրվար ամսից, հաղորդում է AFP-ն։

Ընդդիմադիր կուսակցությունների շուրջ 300 ցուցարարներ ծածանել են Թունիսի դրոշները և ձեռքներին տարել հանրահավաքում ձերբակալվածների լուսանկարները։

Փետրվարի սկզբից ի վեր երկրի իշխանությունները ավելի քան 20 ընդդիմախոսներ ու գործիչներ են ձերբակալել, այդ թվում քաղաքական գործիչներ, նախկին նախարարներ, բիզնեսմեններ, արհմիութենական ակտիվիստներ և Թունիսում ամենահայտնի  Mosaique FM ռադիոկայանի սեփականատիրոջը։

Տեղի և միջազգային իրավապաշտպան խմբերը քննադատել են ձերբակալությունները։ Կիրակնօրյա հանրահավաքում Ալ-Ջումհուրի կուսակցության ներկայացուցիչ Սամիր Բեն Ամորը կոչ արեց «ազգային երկխոսության, որպեսզի ճանապարհային քարտեզ մշակեն Թունիսի փրկության և այն ժողովրդավարության ուղի վերադարձնելու համար»։

Սաիդը, որը գրեթե լիակատար իշխանություն է զավթել այն բանից հետո, երբ սառեցրեց խորհրդարանը և արձակեց Թունիսի կառավարությունը, պնդում է, որ ձերբակալվածներն «ահաբեկիչներ» են եղել, որոնք մասնակցել են «պետական անվտանգության դեմ դավադրությանը»։