ՄԱԿ-ում Իսրայելի ներկայացուցիչ Գիլադ Էրդանը դուրս է եկել Անվտանգության խորհրդի նիստից՝ կարդալով անցյալ տարվա ընթացքում մահացած իսրայելցիների անունները՝ ի նշան բողոքի Հիշատակի օրն Իսրայելին քննադատող հանդիպման անցկացման դեմ, հաղորդում է Times of Israel-ը:
Պաղեստինի հարցով Անվտանգության խորհրդի նիստը կայացել է Նյու Յորքում ՄԱԿ-ի կենտրոնակայանում՝ Ռուսաստանի ղեկավարությամբ։
«Այսօր Իսրայելի պետության համար տարվա ամենանվիրական օրերից մեկն է»,- ասել է Էրդանը։ «Մենք բազմիցս խնդրել ենք տեղափոխել այսօրվա բանավեճը՝ խոսելով այս օրվա խորքային կարևորության մասին, սակայն, ինչքան էլ դա ողբերգական է, խորհուրդը հրաժարվեց զիջել»։
«Այսօրվա բանավեճն անցել է բոլոր սահմանները»,- շարունակել է նա։ «Մինչ իսրայելցիները սգում են, այս խորհուրդը, ինչպես միշտ, կլսի ավելի շատ բացահայտ կեղծիքներ, որոնք դատապարտում են Իսրայել պետությունը և այն կեղծ կերպով ներկայացնում որպես տարածաշրջանի բոլոր խնդիրների արմատ»:
Խոսելով անմիջապես նիստը վարող Ռուսաստանի արտգործնախարար Սերգեյ Լավրովի հետ՝ Էրդանը հարցրեց. «Ի՞նչ կանեիք, եթե այս խորհուրդը հավաքվեր Ռուսաստանի Դաշնությանը և ձեր զինվորներին դատապարտելու համար մայիսի 9-ին՝ նացիստների դեմ տարած հաղթանակի օրը»:
Էրդանը նշել է, որ իսրայելա-պաղեստինյան հակամարտությունը պայմանավորված է պաղեստինցիների համառությամբ և Անվտանգության խորհրդին մեղադրել է կեղծավորության մեջ Իսրայելի վրա կենտրոնանալու համար՝ «անտեսելով Իրանի ապակայունացնող գործունեությունը տարածաշրջանում»։
Էրդանը Խորհրդին կարդացել է այն իսրայելցիների անունները, ովքեր զոհվել են անցյալ տարի իրենց պարտականությունները կատարելիս կամ ահաբեկչական հարձակումների արդյունքում։ Նա հիշատակի մոմ է դրել իր դիմացի սեղանին և իսրայելական պատվիրակության մնացած անդամների հետ հեռացել դահլիճից։
