Հայաստանի անվտանգությունը կարող է երաշխավորել եւ ապահովել միայն համապարփակ խաղաղությունը։ Այս մասին այսօր՝ մայիսի 3-ին, Ազգային ժողովի նիստում կառավարության ժամի ընթացքում հայտարարեց վարչապետ Նիկոլ Փաշինյանը՝ պատասխանելով պատգամավորների հարցերին։
Վարչապետը նշեց, որ խաղաղությունը հնարավոր է, սակայն պակաս կարեւոր չէ, թե ինչպես կարելի է դրան հասնել։
«Խնդիրն այն է, որ կա երկու բաղադրիչ՝ խաղաղության հասնելու քաղաքական կամքը եւ դրան հասնելու պարամետրերի մանրամասները։ Ակնհայտ է, որ քաղաքական կամք ունենք։ Խնդիրն այն է, թե որքանով մեզ կհաջողվի բանակցային գործընթացի արդյունքում ձեւավորել խաղաղության այնպիսի պարամետրեր, որոնք կարող են ընդունելի լինել Հայաստանի եւ հայ ժողովրդի համար»,-ասաց Փաշինյանը։
Խաղաղությունը, ըստ նրա, կարող է հնարավոր լինել այն պարամետրերի դեպքում, որոնք սկզբունքորեն ընդունելի են Հայաստանի եւ հայ ժողովրդի համար։