Մրցակցության պաշտպանության հանձնաժողովի անդամ Շուշան Սարգսյանն առցանց ձևաչափով մասնակցել է Եվրասիական տնտեսական համաժողովի շրջանակում կազմակերպված կլոր սեղան-քննարկմանը, որը նվիրված էր թվային հարթակների կարգավորման թեմային: Քննարկումը վարում էր ԲՐԻԿՍ երկրների մրցակցային իրավունքի և քաղաքականության միջազգային կենտրոնի տնօրեն Ալեքսեյ Իվանովը:
Քննարկմանը մասնակցում էին ԵՏՀ կոլեգիայի մրցակցության և հակամենաշնորհային կարգավորման հարցերով նախարար Բախիտ Սուլթանովը, ԵԱՏՄ երկրների հակամենաշնորհային/ մրցակցային մարմինների ղեկավարներ և այլ պաշտոնյաներ, ԵԱՏՄ դատարանի, ԵԱՏՄ երկրների ֆինանսների նախարարությունների, միջազգային կազմակերպությունների, գիտական և բիզնես համայնքի ներկայացուցիչներ և պաշտոնատար այլ անձինք:
Արդյո՞ք անհրաժեշտ են առանձին կարգավորումներ թվային շուկաների համար, նախընտրություն տալ էքս-անտե, թե՞ էքս-փոսթ կարգավորմանը, իսկ գուցե օգտվել փափուկ իրավունքի գործիքակազմից կամ կիրառել թվարկված մեթոդների համակցումը՝ ո՞րն է հարցի լուծման առավել արդյունավետ տարբերակը: Կլոր սեղանի մասնակիցները ներկայացրել են թեմայի վերաբերյալ իրենց երկրների փորձն ու մոտեցումները:
ՄՊՀ անդամ Շուշան Սարգսյանն, անդրադառնալով բարձրացված հարցերին, մասնավորապես նշել է, որ պետական միջամտությունը թվային շուկաների գործունեությանը, ինչպես էքս-անտե, այնպես էլ էքս-փոսթ, պետք է լինի նպատակային և համաչափ: Նման մոտեցումը կերաշխավորի դրա արդյունավետությունը՝ չխոչընդոտելով նորարարություններին և նպաստելով շուկաների ինքնակարգավորմանը: