Իրանը բանակցություններ է վարում տարածաշրջանի վեց երկրների պաշտոնական անձանց հետ՝ բջջային հեռախոսակապի ցանցերում խանգարումները վերացնելու ուղղությամբ, տեղեկացնում է Tasnim-ը։
Կապի կարգավորման վարչության միջազգային մասնագիտացված կազմակերպությունների գլխավոր տնօրեն Ալիռեզա Դարվիշին կիրակի հայտարարել է Պարսից ծոցի առափնյա պետությունների միջև փորձագետների մակարդակով հանդիպման մասին։ Մասնակիցներն են Իրանի, Սաուդյան Արաբիայի, Քուվեյթի, Բահրեյնի, Օմանի, Քաթարի և Արաբական Միացյալ Էմիրությունների ներկայացուցիչները, նպատակը բջջային կապի ցանցերում խանգարումները վերացնելն է։
Բջջային հեռախոսակապի ցանցերում խանգարումների վերացումը և ծառայությունների որակի բարձրացումը անհրաժեշտություն է՝ նկատի ունենալով բջջային հեռախոսների (4- և 5G) հաղորդակցային տեխնոլոգիաների զարգացումը, ընդգծել է Ալիռեզա Դարվիշին։
Էլեկտրակապի միջազգային միության նախաձեռնությամբ հանդիպումը կայացել է Ժնևում՝ Պարսից ծոցի առափնյա պետությունների ներկայացուցիչների մասնակցությամբ, ավելացրել է նա։
