ՆԱՏՕ-ն վճռականորեն դատապարտում է հարձակումները KFOR (Կոսովոյում ՆԱՏՕ խաղաղապահ ուժեր- խմբ.) զինծառայողների դեմ հյուսիսային Կոսովոյում, որոնց հետեւանքով մի քանի մարդ վիրավորումներ է ստացել։
«Այդ հարձակումներն անընդունելի են։ Բռնությունը պետք է անհապաղ դադարեցվի։ Մենք կոչ ենք անում բոլոր կողմերին ձեռնպահ մնալ այնպիսի գործողություններից, որոնք էլ ավելի են թեժացնում լարվածությունը, եւ սկսել երկխոսություն։ KFOR-ը կնախաձեռնի բոլոր անհրաժեշտ միջոցները՝ աջակցելու համար խաղաղ եւ անվտանգ իրադրությանը եւ կշարունակի գործել անաչառ, իր մանդատին համապատասխան, ելնելով ՄԱԿ Անվտանգության խորհրդի 1999թ. 1244 բանաձեւից»,- նշվել է ՆԱՏՕ հայտարարությունում։
KFOR վերջին տվյալներով՝ ընդհանուր առմամբ 30 խաղաղապահ Կոսովոյում եւ Մետոխիայում վիրավորումներ է ստացել, այդ թվում իտալական առաքելության 11 եւ հունգարական զորակազմի 19 անդամ, տեղեկացրել է սերբական Tanjug լրատվամիջոցը։
Սերբական կողմն ավելի վաղ տեղեկացրել էր, որ այսօրվա անկարգությունների ընթացքում Զվեչանում ցույցի ցրման ժամանակ տուժել է 52 մարդ։
Երկուշաբթի առավոտյան հարյուրավոր, իսկ հետո հազարավոր կոսովցի սերբեր հավաքվել են տեղի վարչակազմի շենքի մոտ երկրամասի հյուսիսում, նրանք պահանջել են հեռացնել Կոսովոյի ոստիկանությանն ու հետ կանչել ալբանացի քաղաքապետերին։ ՆԱՏՕ-ի KFOR զորակազմի զինծառայողները ցույցը ցրելու համար տեղակայվել են Զվեչանի, Լեպոսավիչի եւ Զուբին-Պոտոկի վարչական շենքերի մոտ։ Նրանց հետեւել են Կոսովոյի ոստիկանության մեծաթիվ ուժերը, որոնք թույլ չեն տալիս կոսովցի սերբերին մոտենալ շենքերին։
Կոսովոյում եւ Մետոխիայում ՆԱՏՕ-ի KFOR զորակազմը տեղի ալբանացիներին եւ սերբերին կոչ է արել երկրամասի հյուսիսում ձեռնպահ մնալ իրավիճակի թեժացումից եւ տեղեկացրել է իր ուժերի ավելացման, ինչպես նաեւ Բելգրադում եւ Պրիշտինայում ուժայինների հետ շփումների մասին։
