ԱՆԻՖ-ի տնօրեն Դավիթ Փափազյանը մասնակցել և ելույթ է ունեցել Լոնդոնում կայացած Ինքնիշխան ֆոնդերի ինստիտուտի (SWFI) Global Wealth Forum միջազգային կոնֆերանսում։
ԱՆԻՖ-ի տնօրենը խոսել է վերականգնվող էներգետիկայի ոլորտում ներդրումների հետ կապված պանելային քննարկմանը։ Նա ներկայացրել է Մասդար ընկերության հետ համատեղ ներդրումային ծրագրի արդյունքում ակնկալվող Հայաստանի խոշորագույն արևային էներգիայի ծրագրի «Այգ-1» կայանի առանձնահատկությունները և խոսել կայունության ոլորտում ներդրումների կարևորության մասին։
Ֆորումի շրջանակներում Դավիթ Փափազյանը պարգևատրվել է Ինքնիշխան ֆոնդերի ինստիտուտի «Լավ գործընկեր» պարգևով։ Պարգևը շնորհվում է կապիտալի ստեղծման բնագավառում անձնական ջանքերի և ձեռքբերումների համար։ Պարգևատրվողների հետ իրենց մասնագիտական ձեռքբերումների մասին հարցազրույց է վարել Ինքնիշխան ֆոնդերի միջազգային ինստիտուտի խորհրդի նախագահ Lակշմի Նարայանանը։
Այս տարի պարգևատրվողների շարքում են եղել աշխարհի մի քանի երկրների սուվերեն ֆոնդերի ղեկավարներ, պետական գործիչներ, ներդրողներ։
Լոնդոնում անցկացվող ամենամյա ֆորումին մասնակցել է ավելի քան 300 պատվիրակ մի քանի տասնյակ երկրից, այդ թվում՝ ինքնիշխան ֆոնդերի ղեկավարներ, կառավարությունների և պառլամենտների անդամներ, մասնավոր ներդրումային ֆոնդեր, անհատ ներդրողներ։ Պանելային քննարկումները վարել են աշխարհի առաջատար լրատվամիջոցների ներկայացուցիչներ։
Ինքնիշխան ֆոնդերի միջազգային ինստիտուտի պլատֆորմի անդամ են մոտ 600 հազար ներդրումային ոլորտի պրոֆեսիոնալ ներդրումային մասնավոր և ինքնիշխան ֆոնդերի ներկայացուցիչներ, անհատ ներդրողներ։
