ԱՄՆ պետդեպարտամենտը տեղեկացրել է, որ Ռուսաստանն առայժմ ոչ մի ցանկություն չի ցուցաբերել Ուկրաինայի հակամարտության դիվանագիտական լուծումը գտնելու հարցում, տեղեկացրել է «Голос Америки»-ն։
«Ռուսաստանը նախկինի պես փոխգործակցության ոչ մի ցանկություն չի ցուցաբերում, դրա փոխարեն ձեռնարկում է գործողություններ, որոնք թեժացնող բնույթ են կրում, վնաս են հասցնում քաղաքացիական բնակչությանը, քաղաքացիական ենթակառուցվածքին, էներգետիկ ենթակառուցվածքին, հարվածներ է հասցնում հիվանդանոցներին, բազմաբնակարան շենքերին»,- լրագրողներին ասել է պետդեպարտամենտի ներկայացուցիչ Վեդանտ Փատելը։
«Ուստի, քանի դեռ Ռուսաստանը պատրաստ չէ բարեխիղճ շփումների, մենք կաջակցենք մեր ուկրաինացի գործընկերներին անվտանգության ապահովման, հումանիտար օգնության, Ռուսաստանի Դաշնությանը պատժամիջոցներով պատասխանատվության ենթարկելու եւ արտահանման վերահսկողության միջոցով»,- ավելացրել է նա։
Փատելը հիշեցրել է, որ անցած շաբաթ ԱՄՆ պետքարտուղար Էնթոնի Բլինքենը Հելսինկիում շատ է խոսել աշխարհի տարբեր ծայրերից ստացվող խաղաղության առաջարկների մասին։
«Բայց քանի դեռ Ռուսաստանի Դաշնությունը չի միանա բարեխիղճ դիվանագիտական աշխատանքին, մենք այսուհետ եւս կաջակցենք մեր ուկրաինացի գործընկերներին»,- ասել է գերատեսչության ներկայացուցիչը։
«Ի վերջո, հենց Ռուսաստանը պետք է որոշի՝ արդյոք բարեխղճորեն կմասնակցի այդ դիվանագիտական ջանքերին, թե ոչ»,- նշել է Փատելը։