Հայկական ծագում ունեցող ռուսաստանցի տիեզերագնաց Հարություն Կիվիրյանը հունիսի 22-ին այցելել է Ծիծեռնակաբերդի հուշահամալիր։
NEWS.am-ի թղթակցի հետ զրույցում Հարություն Կիվիրյանն ասել է, որ գիտի Հայոց ցեղասպանության մասին ըստ իր կարդացի եւ ծնողների, ավելի շատ՝ պապիկի եւ տատիկի պատմածների, որոնք պատմել են իրենց ծնողների պատմությունները։
«Իմ նախատատերն ապրել են Ցեղասպանության ժամանակ, տեղեկություն փոխանցել եւ պատմել այդ իրադարձությունների մասին։ Պապս պատմում էր ազգականների մասին, այն մասին, թե ինչպես է մեկը խուսափել գնդակահարությունից, ինչպես է փախել Արեւմտյան Հայաստանից Ռուսաստանի տարածք, ինչպես է այդ ամենը կատարվել»,- ավելացրել է նա։
Նա նշել է, որ այդ պատմություններում արտացոլվել է նրանց մեծ ցավը, որն զգացել է ողջ հայ ժողովուրդը, ուստի հիշատակն ու այս հուշահամալիրը շատ կարեւոր են։
«Ես եկել եմ այստեղ, որպեսզի հարգանքի տուրք մատուցեմ բոլոր զոհերին, ովքեր տուժել են Ցեղասպանության ժամանակ»,- ավելացրել է տիեզերագնացը։
Կիվիրյանը նշել է, որ տանը ծնողների հետ միշտ փորձում է շփվել հայերեն։
«Երբ երկար եմ գտնվում տնից դուրս, մի փոքր մոռացած եմ լինում, բայց վերադառնալով՝ նորից ներգրվում ու լավ կարողանում եմ շփվել, հասկանում եմ։ Գրական լեզուն կիսով չափ եմ հասկանում, մանավանդ երբ արագ են խոսում։ Փորձում եմ ուսումնասիրել նաեւ գրական լեզուն»,- ասել է նա։
Կիվիրյանը բոլորին, հատկապես երիտասարդությանը մաղթեց միշտ բարձր նպատակներ դնել, որոնց կարելի է ձգտել։
«Ցանկանում եմ նաեւ, որ միշտ այդ նպատակներին հասնելու, առաջ ընթանալու, զարգանալու հնարավորություն լինի։ Զարգացումը միշտ կարեւոր է ցանկացած մարդու, ցանկացած երկրի համար»,- ավելացրել է նա։