ՀՀ մարդու իրավունքների պաշտպան Անահիտ Մանասյանը 1 ամիս առաջ նամակ է ուղարկել Ադրբեջանի մարդու իրավունքների պաշտպանին, սակայն դեռ արձագանք չի ստացել: Այս մասին այսօր՝ օգոստոսի 17-ին, կառավարության նիստից հետո լրագրողների հետ զրույցում ասաց Անահիտ Մանասյանը:
Անդրադառնալով Արցախում հումանիտար աղեցի առնչությամբ միջազգային կառույցների արձագանքին՝ Մանասյանն ասաց.
«Այստեղ կարիք կա գործուն քայլեր ձեռնարկելու: Շատ կարեւոր է, որպեսզի միջազգային դերակատարները նաեւ գործուն քայլեր ձեռնարկեն՝ խնդիրը կարգավորելու ուղղությամբ: Մենք չենք կարող ժամանակակից աշխարհում խոսել առնվազն երաշխավորված իրավունքների մասին: Մենք պետք է ունենանք հիմնարար իրավունքների լիակատար պաշտպանություն եւ երաշխավորում»:
Անդրադառնալով Լաչինի միջանցքում Ադրբեջանի կողմից ապօրինի տեղադրված անցակետից Արցախի բնակիչ Վագիֆ Խաչատրյանին գերեվարելուն, Մանասյանն ասաց.
«Միջազգային մարդասիրական իրավունքի տեսանկյունից անձը, փաստացի, ազատությունից զրկվել է մարդասիրական առաքելության իրականացման համատեքստում: Երբ նա մարդասիրական պաշտպանության ներքո գտնվող անձ էր: Նրա նկատմամբ միջազգային հետախուզում հայտարարված չէ, եւ անձը զինվորական ծառայության է անցել շատ ավելի ուշ, քան նրան մեղսագրվող արարքն է կատարվել»:
Անդրադառնալով երեկ ՄԱԿ-ի ԱԽ հրատապ նիստում Ադրբեջանի ներկայացուցչի էժանագին ելույթին, որում ներառված էին արցախցիների իբրեւ թե «լավ» ապրելակերպը եւ հարցին, թե այս ընթացքում ի՞նչ գործուն քայլեր է անում ՀՀ ՄԻՊ-ը, Մանասյանն ասաց. «ՄԻՊ-ը արտահերթ զեկույցներ է հրապարակել, որտեղ շատ մանրամասն ներկայացված է իրավիճակը Արցախում: Այդտեղ ոչ թե ընդհանրական ձեւակերպումներ են, այլ քանակական եւ վիճակագրական տվյալներ են ներկայացված, որակակական վերլուծություններ են արված, մասնավորապես, եզրահանգումներ թե որ հիմնարար իրավունքների հետ կապված են խնդիրներ առաջ գալիս: Մենք 2 շաբաթը մեկ պարբերականությամբ մեր միջազգային գործընկերներին ուղարկում ենք իրավիճակի հետ կապված հիմնական զարգացումները»:
