Վրաստանի նախագահ Սալոմե Զուրաբիշվիլին խախտել է Հանրապետության Սահմանադրությունը՝ առանց կառավարության համաձայնության այցելելով Գերմանիա: Այս մասին վրացական Իմեդի հեռուստաալիքին տված հարցազրույցում ասել է «Վրացական երազանք՝ Ժողովրդավարական Վրաստան» իշխող կուսակցության նախագահ Իրակլի Կոբախիձեն։

«Հասկանալի է, որ Վրաստանի նախագահի կողմից շատ կոպտորեն խախտվում է Սահմանադրությունը։ Նա երդում է տվել այդ Սահմանադրությանը, սակայն կոպտորեն խախտում է այն։ Դա անարձագանք չի մնա»,-ասել է նա։

Քաղաքական գործիչը հավելել է, որ նախագահի նման քայլը հիմք է նրա իմպիչմենթի համար, սակայն վստահ է, որ դա տեղի չի ունենա, քանի որ ընդդիմությունը խորհրդարանում դեմ կքվեարկի Զուրաբիշվիլիի հրաժարականին:

Վրաստանի նախագահի աշխատակազմը չորեքշաբթի օրը հայտնել է, որ Զուրաբիշվիլին սկսում է արտասահմանյան այցերի շարք՝ Հանրապետությանը ԵՄ անդամի թեկնածուի կարգավիճակ տալու նպատակով:

Չնայած կառավարության մերժմանը՝ Զուրաբիշվիլին, այնուամենայնիվ, այցելել է Գերմանիա։

Սահմանադրության համաձայն՝ Վրաստանի նախագահը միջազգային հարաբերություններում ներկայացուցչական լիազորություններն իրականացնում է կառավարության համաձայնությամբ։