Հեռուստատեսության եւ ռադիոյի դերասանների ամերիկյան ֆեդերացիան (SAG-AFTRA) չորեքշաբթի տեղեկացրել է, որ նախնական համաձայնություն է ձեռք բերվել ԱՄՆ Կինոյի եւ հեռուստատեսության պրոդյուսերների միության (AMPTP) հետ, ինչը նրա անդամներին հնարավորություն է տալիս դադարեցնել գործադուլը։
«Ուրախությամբ եւ հպարտությամբ տեղեկացնում ենք, որ հեռուստատեսության եւ թատրոնի մեր բանակցային կոմիտեն միաձայն քվեարկել է ԱՄՆ կինոյի եւ հեռուստատեսության պրոդյուսերների միության (AMPTP) հետ նախնական համաձայնության օգտին։ Նոյեմբերի 9-ին, ժամը 00.01-ից մեր գործադուլը պաշտոնապես դադարեցվում է, փակվում են նստացույցերի անցկացման բոլոր վայրերը»,- նշված է X սոցցանցում SAG-AFTRA-ի էջում հրապարակված հայտարարությունում։
«1 մլրդ դոլարի պայմանավորվածության շրջանակում մենք արտակարգ մասշտաբի գործարք ենք կնքել»,- նշվել է հաղորդագրությունում։ Նախատեսվում են նվազագույն աշխատավարձերի բարձրացում, ֆեդերացիայի անդամների պաշտպանության միջոցներ «արհեստական բանականության սպառնալիքներից», եւ առաջին անգամ ներառված է «բոնուս հոսքային հեռարձակմանը մասնակցելու համար»։
Հեռուստատեսության եւ կինոյի ամերիկյան ֆեդերացիայի ( ներկայացնում է մոտ 160 հազար մարդու) դերասանների գործադուլը սկսվել էր հուլիսի 14-ին եւ փաստացի դադարեցրել ԱՄՆ կինոինդուստրիայի արտադրությունը։ Դերասանները պահանջում էին բարձրացնել աշխատավարձերը, փոխհատուցումներ եւ սահմանափակումներ կատարել կինոյում արհեստական բանականության օգտագործման համար։
