Ճապոնական Mazda-ն և Subaru-ն կասեցրել են իրենց մոդելների արտադրության պատվերները Daihatsu-ի՝ արդյունաբերության մեկ այլ ընկերության գործարաններում՝ վթարի թեստի տվյալների կեղծման և շահագործման անվտանգության հետ կապված այլ խախտումների պատճառով, հաղորդում է Yomiuri թերթը:
Նշվում է, որ Daihatsu գործարանները միասին արտադրել են ավտոմեքենաների ութ մոդելներ, որոնք այնուհետ վաճառվել են Mazda և Subaru ապրանքանիշերով։ Դրանց արտադրությունը վերսկսելու ժամկետների մասին տեղեկատվություն չի հաղորդվում։
Սկանդալի պատճառ է դարձել Daihatsu-ի կողմից իր մեքենաների պետական սերտիֆիկացում ստանալու համար տրամադրված տեղեկատվության կեղծումը։ Ապրիլին ընկերությունը նման խախտումներ է հայտնաբերել մեքենաների չորս մոդելների առնչությամբ, որից հետո անկախ հանձնաժողով է հրավիրվել։ Նա հայտնաբերել է ավելի քան 170 խախտումներ, որոնք վերաբերում են տասնյակ մոդելների, այդ թվում՝ Toyota մայր ընկերության ապրանքանիշով վաճառվողներին: Արդյունքում որոշվել է դադարեցնել Daihatsu-ի բոլոր մեքենաների մատակարարումները Ճապոնիայում և արտասահմանում, ներառյալ Probox, Town Ace, Roomy և Pixis մոդելները, որոնք վաճառվում են Toyota ապրանքանիշով: Դեռ ապրիլին մի շարք մոդելների արտադրությունը դադարեցվել էր։
Այդ կապակցությամբ Ճապոնիայի հանրային հողերի, ենթակառուցվածքների, տրանսպորտի և զբոսաշրջության նախարարության աշխատակիցները ստուգումներ են սկսել Daihatsu-ի գլխավոր գրասենյակում: Նրանք մտադիր են ուսումնասիրել համապատասխան փաստաթղթերը և հարցազրույց վերցնել ընկերության ղեկավարությունից։ Բացի այդ, Daihatsu-ն հաջորդ շաբաթվա ընթացքում կդադարեցնի գործունեությունը Ճապոնիայում գտնվող իր բոլոր չորս գործարաններում:
2022 թվականին Toyota-ն և նրա դուստր ձեռնարկությունները՝ Daihatsu-ն և Hino-ն ամբողջ աշխարհում արտադրել են 10,51 միլիոն ավտոմեքենա: Միաժամանակ, Daihatsu-ին բաժին է ընկնում մոտ 1,7 մլն միավոր։ Daihatsu-ն մասնագիտացած է կոմպակտ ենթակոմպակտ մեքենաների արտադրության մեջ: Այն սերտորեն համագործակցում է Toyota-ի հետ 1967 թվականից։ 2016 թվականից ընկերությունը 100%-ով պատկանում է Toyota-ին։ Ճապոնական շուկայում Daihatsu-ին բաժին է ընկնում փոքր մեքենաների սեգմենտի վաճառքների մոտ մեկ երրորդը:
Վերջին մի քանի տարիների ընթացքում ճապոնական ավտոմոբիլային ընկերությունները, ներառյալ Nissan Suzuki-ն և Mazda-ն, արդեն հայտնվել են արտանետումների տվյալների կեղծման հետ կապված սկանդալների կենտրոնում: