Ես Երևանում մեքենաների կայանման նոր իրավիճակից ոչինչ չհասկացա։ Այս մասին ֆեյսբուքյան իր էջում գրել է «Այբ» կրթական հիմնադրամի հոգաբարձուների խորհրդի նախագահ, ABBYY ընկերության փոխնախագահ Արամ Փախչանյանը։
Նա նաեւ նշել է. «Բիզնեսում մի պարզ սկզբունք կա՝ եթե գին ես բարձրացնում, այն էլ՝ թռիչքաձեւ, 15 անգամ միանգամից, մի բան պիտի փոխես։ Քաղաքի կայանման իրավիճակը մնում է ծայրահեղ փնթի։ Մի կողմից, կան կարմիր գծեր, մյուս կողմից՝ ինչ-որ տարածքներ, որոնք անհասկանալի է՝ ով է տնօրինում, եւ արդյո՞ք այնտեղ մեքենան կայանելը անվճար է։
Վճարովի փողոցներին հարակից կան բազմաթիվ փոքր եւ նեղ փողոցներ, որտեղ եթե կայանումը չվերահսկվի, շատ արագ կառաջանա քաոտիկ վիճակ։ Էլ չեմ ասում, որ կան բազմաթիվ առանց հստակ կարգավիճակի մարդիկ, որոնք շարունակում են բաշխել տեղերը, ներառյալ կարմիր գծերով, դրա դիմաց գումար ակնկալելով։
Կա՞ մարդ քաղաքապետարանում, որ այս ամենը մտածել է, եւ եթե անգամ էշի ականջում քնած էր, արդեն արթնացել է եւ ինչ-որ քայլեր է ձեռնարկում»:
