Porsche-ն անցկացրել է նոր (երկրորդ) սերնդի Macan միջին չափի սպորտային քրոսովերի համաշխարհային պրեմիերան, հայտնում է Drom.ru-ն։
Մոդելը կոնցեպտուալ առումով տարբերվում է՝ այժմ այն մաքուր էլեկտրական մեքենա է։
Վաճառքի մեկնարկին կառաջարկվի երկու մոդիֆիկացիա՝ Macan 4 և Macan Turbo: Երկուսն էլ լիաքարշակ են, ունեն մեկ շարժիչ մեկ առանցքի վրա և հագեցած են 95 կՎտ/ժ հզորությամբ մարտկոցով։
Առաջին մոդիֆիկացիայի մեջ շարժիչներն արտադրում են 300 կՎտ (408 ձիաուժ) հզորություն և 650 Նմ պտտող մոմենտ, երկրորդի բնութագրիչները՝ 470 կՎտ (639 ձիաուժ) և 1130 Նմ։
Macan 4-ի առավելագույն արագությունը սահմանափակված է 220 կմ/ժ-ով, իսկ 0-ից 100 կմ/ժ արագությունը զարգացնում է 5,1 վայրկյանում: Macan Turbo-ն կարող է զարգացնել մինչև 260 կմ/ժ արագություն, իսկ 0-100 կմ/ժ արագությունը հասնում է 3,3 վայրկյանում:
Մեկ լրիվ լիցքավորման դեպքում քրոսովերի հեռահարությունը 591-613 կմ է։
Արգելակման էներգիայի վերականգնման համակարգի առավելագույն հզորությունը 240 կՎտ է։ Մարտկոցը կարող է հոսանք ընդունել 270 կՎտ հզորությամբ գերարագ լիցքավորման կայանից։
Գերմանիայում նոր Porsche Macan-ը կառաջարկվի 83993 եվրո գնով։ Հաճախորդներին մեքենաների առաքման մեկնարկը նախատեսված է հուլիսին:
Առաջին սերնդի Macan-ն արտադրվում է 2014 թվականից, 10 տարվա ընթացքում մեքենան վաճառվել է 800 հազար միավոր ամբողջ աշխարհում։