Շվեդիայի վարչապետ Ուլֆ Քրիստերսոնն ուրբաթ կմեկնի Բուդապեշտ՝ հանդիպելու իր հունգարացի գործընկեր Վիկտոր Օրբանի հետ․ հանդիպումը տեղի կունենա նախքան Հունգարիայի խորհրդարանի կողմից ՆԱՏՕ-ին անդամակցելու Շվեդիայի հայտի հետաձգված քվեարկությունն անցկացնելը, հայտնում է «Reuters»-ը։
Շվեդիան ՆԱՏՕ-ին անդամակցելու հայտ էր ներկայացրել գրեթե երկու տարի առաջ՝ Ուկրաինայում Ռուսաստանի ռազմական հատուկ օպերացիայի մեկնարկից հետո։
Հունգարիան ՆԱՏՕ-ի անդամ միակ երկիրն է, որը դեռ պետք է վավերացնի Շվեդիայի հայտը: Օրբանի կուսակցությունը բազմիցս հետաձգել է քվեարկությունը՝ պատճառաբանելով, թե Շվեդիան քննադատում է Հունգարիային օրենքի գերակայությունը խախտելու համար։
Երեքշաբթի օրն Օրբանն ասել է, որ ուրախ կլինի ողջունել Քրիստերսոնին Բուդապեշտում:
«Մենք նախատեսում ենք քննարկել Հունգարիայի և Շվեդիայի միջև պաշտպանության և անվտանգության քաղաքականության ոլորտում համագործակցության ամրապնդման ուղիները, ինչպես նաև Եվրամիության Խորհրդում Հունգարիայի նախագահության մեր ծրագրերը և ԵՄ ռազմավարական օրակարգը»,- գրել է Օրբանն իր միկրոբլոգում:
Ավելի վաղ՝ երեքշաբթի, Օրբանի «Ֆիդես» կուսակցությունը խորհրդարանին առաջարկել էր փետրվարի 26-ին քվեարկության դնել Շվեդիայի՝ ՆԱՏՕ-ին անդամակցելու հայտը։
«Fidesz»-ը մեծամասնություն ունի խորհրդարանում և կարող է ցանկացած պահի հաստատել սկանդինավյան երկրի անդամակցությունը, քանի որ համապատասխան նախագիծը ներկայացվել էր օրենսդիրներին 2022 թվականի կեսերին:
