Վաշինգտոնը կարծում է, որ Գազայի հատվածի վերաբերյալ ցանկացած ծրագիր պետք է բացառի նրա տարածքի չափերի փոքրացում, օկուպացիա, ինչպես նաև պաղեստինյան անկլավի օգտագործումն ահաբեկիչների կողմից։ Այս մասին Արգենտինայի արտաքին գործերի նախարար Դիանա Մոնդինոյի հետ համատեղ մամուլի ասուլիսի ժամանակ հայտարարել է ԱՄՆ պետքարտուղար Էնթոնի Բլինքենը։
«Ինչպես գիտեք, կան որոշ հիմնական սկզբունքներ, որոնք մենք շարադրել ենք ամիսներ առաջ, որոնք, կարծում ենք, շատ կարևոր են Գազայի ապագայի համար: Դրանց թվում է այն, որ Գազայի հատվածը չի կարող հարթակ լինել ահաբեկիչների համար։ Իսրայելի կողմից Գազայի վերաբնակեցում չպետք է լինի, Գազայի հատվածի չափը չպետք է փոխվի»,- ասել է նա՝ հավելելով՝ ԱՄՆ-ը ցանկանում է, որ ցանկացած ծրագիր համապատասխանի այս սկզբունքներին։
Կան այլ սկզբունքներ ևս, բայց այս երեքը, շեշտել է Բլինքենը, ամենից գլխավորն են։