Ռուսաստանի կողմից աճող սպառնալիքի ֆոնին ՆԱՏՕ-ի անդամ Ալբանիան այդ կառույցի ինքնաթիռներիկն աջակցելու համար մարտի 4-ին բացել է խորհրդային ժամանակների վերականգնված ավիաբազան: Այդ մասին հայտնել է ալբանական կառավարության ղեկավար Էդի Ռաման, փոխանցում է VOA-ն:

Հյուսիսատլանտյան դաշինքն ավելի քան 50 միլիոն եվրո է ծախսել Կուչովայի ավիաբազայի արդիականացման համար:

«Սա հիմք է, որը անվտանգության ևս մեկ տարր կավելացնի մեր Արևմտյան Բալկանների տարածաշրջանի համար, որը մենք բոլորս գիտենք, գտնվում է վտանգի տակ Ռուսաստանի Դաշնության սպառնալիքի և նեոիմպերիալիստական նկրտումների պատճառով», - ասել է Ռաման:

Երկու կործանիչներ, որոնք Իտալիայից թռչում էին ՆԱՏՕ-ի «Ավիանո» ավիաբազայից, վայրէջք են կատարել Կուչովում՝ նշելու օդանավակայանի շահագործման մեկնարկը: Ավիաբազան գտնվում է Կուչովա փոքրիկ քաղաքում, որը ժամանակին կոչվում էր «Ստալինյան քաղաք», երբ սառը պատերազմի տարիներին այնտեղ տեղակայված էին խորհրդային և չինական ՄԻԳ-երը։

«Այսօր մենք ապրում ենք այլ դարաշրջանում, և, բարեբախտաբար, Ալբանիան գտնվում է մյուս կողմում»,- ընդգծել է Ալբանիայի վարչապետը։