Ռուսները բաց տեքստով մեզ ասում են՝ կողմնորոշվեք. Ընդ որում, այդ կոչը բացի իշխանություններից, ուղղված է նաեւ ժողովրդին: Այս մասին NEWS.am-ի հետ զրույցում նշեց քաղաքական վերլուծաբան Արգիշտի Կիվիրյանը՝ անդրադառնալով Ռուսաստանի ԱԳ նախարար Սերգեյ Լավրովի հայտարարությանը, ով նշել էր, թե ափսոսում են, որ Հայաստանի ղեկավարությունը, ըստ էության, գիտակցված որոշում է կայացրել վարել Ռուսաստանի հետ հարաբերությունների հետեւողական վատացման, ԼՂ-ում տեղի ունեցած ամեն ինչում Ռուսաստանին մեղադրելու գիծը:
«Նման իրավիճակի առաջ Ռուսաստանը ժամանակին դրել էր Ուկրաինային, թե ինչով դա ավարտվեց, բոլորս տեսանք: Այսինքն եթե ժողովուրդը կիսում է իր իշխանությունների վարած քաղաքականությունը, ուրեմն այդպիսի ժողովուրդներին չեն խղճում: Ռուսաստանը նոր չէ, որ այս հարցերը դնում է, ուղղակի հռետորաբանությունն է կոշտանում: Շատ ավելի կոշտ կլինի, երբ Ռուսաստանը Ուկրաինայի հարցը լուծելուց հետո թեքվի դեպի այս տարածաշրջան: Վերջին խոսքը հնչեցնելու է Պուտինը եւ դա լինելու է հրապարակային խոսք: Այս ընթացքում ռուսները զգուշացնում են, ասում են՝ հստակ կողմնորոշվեք, որ իրենք էլ իմանան, թե իրենց գործողությունները ոնց են ձեւավորում:
Համարյա նույնպիսի իրավիճակ Հայաստանի նկատմամբ եղել է 1918-1920 թվականներին: Այդ թվականներին, 2 տարի ռուսները զգուշացնում էին հայերին: Ընդ որում, 1920-ի ընթացքում շատ ավելի կոշտ հռետորաբանությամբ: Այն ժամանակ էլ Հայաստանի իշխանությունները համառորեն չէին ուզում հասկանալ իրավիճակը: Հիմա նույնպես չեն ցանկանում հասկանալ իրավիճակը եւ մեր հակառակորդների թիվը ուզում են ավելացնել շատ դաժան հակառակորդով՝ ի դեմս Մոսկվայի»,-ասաց Կիվիրյանը:
Նա ընդգծեց, որ Ռուսաստանում հոգնել են Նիկոլ Փաշինյանի «կապիկության քաղաքականությունից»: «Դրա համար ասում են՝ բալիկ ջան, գնա մի հատ հստակեցրու ու հստակ ասա: 1920-ին էլ Հայաստանի ղեկավարները Արաքսն անցան ու իրենց կյանքն էին ապրում եվրոպական երկրներում: Հիմա էլ նույն ձեւով ՀՀ ներկայիս իշխանություններն էլ կլցվեն ինքնաթիռը, կանադաներում ինչ-որբ տեղ կտեղավորվեն: իսկ հայ ժողովուրդը կքաշի դրա ողջ բեռը»:
