Հայաստանը ստանձնել է ԵԱՏՄ նախագահությունը, այս տարի Հայստանում ԵԱՏՄ անդամ երկրների ղեկավարների նիստ տեղի ունենալո՞ւ է, թե ոչ: Այս մասին այսօր՝ մարտի 11-ին, ԱԺ Տարածաշրջանային և եվրասիական ինտեգրման հարցերի հանձնաժողովի նիստում դիմելով հանձնաժողովի փոխնախագահ Վաղարշակ Հակոբյանին, հարցրեց «Հայաստան» խմբակցության պատգամավոր Ագնեսա Խամոյանը՝ նկատի ունենալով այն, որ Հայաստանը վավերացրել է Հռոմի ստատուտը եւ հնարավոր է ՌԴ նախագահ Վլադիմիր Պուտինը չգա Հայաստան, քանի որ այստեղ կարող են նրան ձերբակալել:
Ի պատասխան ՔՊ-ական պատգամավորը պատասխանեց. «ՀՀ սուվերեն տարածքի վրա տեղի է ունեցել ռազմական գործողություն ու մենք ՀԱՊԿ-ից չենք ստացել համապատասխան գնահատական, որն ակնկալել ենք, որպես ռազմաքաղաքական դաշինքի անդամ: Մենք նշել ենք, որ հարցեր ունենք, այդ մասին խոսել ենք, այդ թվում աշխատանքային քննարկումներում: Այդ արձանագրությունների արդյունքում մենք հանգել ենք այն գնահատականին, որը հնչեցրել է ՀՀ վարչապետը: Այդ գնահատականը հնչեցնելուց հետո Հայաստանը ստանձնել է ԵԱՏՄ նախագահությունը: Դա ռոտացիոն համակարգ է եւ որոշակի գործողություններ կան, որ մենք պետք է իրականացնենք:
Ես կարծում եմ՝ ԵԱՏՄ բլոկում մենք բավականին արդյունավետ գործունեություն ենք ծավալում որպես տնտեսություն: ԵԱՏՄ-ն բավականին մեծ հնարավորություններ է մեզ համար ընձեռել եւ ընձեռում առնվազն վերջին տարիներին մեր տնտեսական քաղաքականության արդյունքում:
Հայաստանը ԵԱՏՄ կնոնադրությամբ եւ ԵԱՏՄ օրենքներով սահմանված կարգով առաջնորդվելու է եւ կատարելու է իր պարտականությունները»,- ասաց նա։
Ագնեսա Խամոյանը նկատեց, որ ինքն իր հարցի պատասխանը չստացավ, ի վերջո, Հայաստանում այս տարի ԵԱՏՄ երկրների ղեկավարների նիստ լինելու է, թե չի լինելու. «Վլադիմիր Պուտինը Հայաստան գալո՞ւ է, թե՞ չի համարձակվելու գալ, որովհետեւ Հայաստանը վավերացրել է Հռոմի ստատուտը»:
Վաղարշակ Հակոբյանն ասաց. «Այդ հարցին բազմաթիվ անգամ մեր պաշտոնական աղբյուրները անդրադարձել են: Ես ձեզ հավաստիացնում եմ, ՀՀ-ն կատարելու է իր բոլոր պարտավորությունները: Թե այդ պարտավորությունների արդյունքում կլինի այց Հայաստան, թե չի լինի, կլինի գործողություն որեւէ այլ երկրում, դա այլ հարց է: Երբ լինի կոնսենսուս, որ բոլորը պետք է այցելեն Հայաստան, կամ այլ երկիր, այդ գործողությունը տեղի կունենա: Բոլոր կնճռոտ հարցերը բոլոր գործընկերների հետ քննարկումների փուլում են»: