Ռուսաստանի մի քանի քաղաքներում խուզարկություններ են կատարվում պատերազմին դեմ նկարիչների եւ ակտիվիստների տներում, նրանց մի մասին տարել են հարցաքննության, տեղեկացրել է «Сетевые свободы»-ն։
Սանկտ Պետերբուրգում ԱԴԾ աշխատակիցները խուժել են նկարիչներ Կատրին Նենաշեւայի եւ Նատաշա Չետվերիոյի բնակարան, նրանց մոտ խուզարկություն է կատարվել։ Խուզարկությունից հետո Նենաշեւային տարել են հարցաքննության, գրել է Sota-ն։
Ուժայինները խուզարկություն են կատարում նաեւ «Մեդիազոնա»-ի հրատարակիչ Պյոտր Վերզիլովի մոր եւ Pussy Riot-ի մասնակից Մարգարիտա Կոնովալովայի (Ռիտա Ֆլորես) մոտ։
Եկատերինբուրգցի նկարիչ Իլյա Մոզգիին խուզարկությունից հետո տարել են հարցաքննության։ Ուլայնովսկում խուզարկությունից հետո ուժայինները բռնել են նկարիչ Իլյա Խոլտովին։ Խուզարկության ժամանակ նրանից առգրավել են երկու կտավ եւ համակարգչային տեխնիկա։
Բացի այդ, ուժայինները խուզարկություններ են կատարում «Յավ» արտ-խմբի մասնակիցների մոտ։
Խուզարկությունների մի մասն արտոնվել է Մոսկվայի Լեֆորտովյան դատարանի կողմից ՌԴ Քր.օր. 275 հոդվածով (պետական դավաճանություն) եւ կարող է կապված լինել Պյոտր Վերզիլովի գործի հետ, նշել է «Сетевые свободы»-ն։
Մեկ օր առաջ Մոսկվայի Լեֆորտովյան շրջանային դատարանը չեղարկել էր Վերզիլովի հեռակա դատավճիռը եւ գործն ուղարկել նոր քննարկման արարողակարգային խախտումների պատճառով։
Վերզիլովի դեմ գործը հարուցվել է սոցցանցերի գրառումների պատճառով, որոնցում նա պատմել է Բուչայի սպանությունների մասին։ Քննության վարկածով՝ Վերզիլովն իր հրապարակումներով «իրական սպառնալիք է ստեղծել կեղծ կարծիքի ձեւավորման համար հատուկ ռազմական գործողության նպատակների եւ խնդիրնեի մասին»։ Վերզիլովի գրառումներում, նշել է ՔԿ-ն, ուղերձ կա, որը «կարող է սոցիալական լարվածություն հրահրել եւ վնաս պատճառել Ռուսաստանի Դաշնության շահերին»։
Պյոտր Վերզիլովը 2020 թվականից գտնվում է Ռուսաստանի սահմաններից դուրս։ Անցած տարվա դեկտեմբերին ուժայինները խուզարկել են նրա մոր Մոսկվայի բնակարանը, ինչից հետո կնոջը կանչել են հարցաքննության։ 2023թ. մարտի վերջին Բասմանյան դատարանը հեռակա ձերբակալել է Վերզիլովին «ֆեյքերի» գործով։
