Իրանի նախագահ Էբրահիմ Ռաիսին չորեքշաբթի Թեհրանում ընդունել է ՀԱՄԱՍ-ի քաղբյուրոյի ղեկավար Իսմայիլ Հանիեին, հայտնում է Mehr-ը։
Հանդիպման ընթացքում Ռաիսին ասել է, որ Իսրայելը տարածաշրջանում անվտանգության բացակայության հիմնական պատճառն է: «Գազայի ճնշված ժողովրդի հզոր դիմադրության շնորհիվ Պաղեստինի խնդիրը դուրս է եկել իսլամական աշխարհի սահմաններից և դարձել ողջ մարդկության խնդիրը», - ասել է Ռաիսին: «Աշխարհի ժողովուրդներն ամբողջ սրտով ատում են Սիոնիստական հանցավոր ռեժիմին և նրա գլխավոր աջակից ԱՄՆ-ին։
Այն, ինչ այսօր ապացուցված է աշխարհի բոլոր մարդկանց համար, Պաղեստինի հարցի օրինականությունն է», նշել է Ռաիսին՝ ընդգծելով, որ Իսրայելը «տարածաշրջանում բոլոր անկայունությունների արմատն է և խաղաղությանը դեմ հանդես եկող կազմակերպություն»։
«Գազայում տեղի ունեցած վերջին իրադարձությունները հերթական խոշոր սկանդալն են դարձել Ամերիկայի և արևմտյան որոշ երկրների համար, որոնք աջակցում են երեխաներին սպանող Սիոնիստական ռեժիմին», - հավելել է նա: Իր հերթին Հանիեն շնորհակալություն է հայտնել Իրանին և Իրանի ժողովրդին Գազայի ժողովրդին ցուցաբերած աջակցության համար:
Ավելի վաղ Հանիեն Թեհրանում հանդիպել էր Իրանի արտգործնախարար Հոսեյն Ամիր Աբդոլլահիանի և Իրանի գերագույն առաջնորդ Խամենեիի հետ։