![](img/news/81/59/80/default.jpg)
ԱՄՆ պաշտպանության նախարար Լլոյդ Օսթինը իսրայելցի գործընկերոջ՝ Յոավ Գալանտի հետ հեռախոսազրույցում հայտնել է, որ Իսրայելի վերջերս հասցրած հարվածը World Central Kitchen (WCK) հումանիտար կազմակերպության աշխատակիցներին կդժավարցնի Գազայի հատված հումանիտար օգնության առաքումը։ Այս մասին նշվել է Պենտագոնի մամուլի քարտուղար Պատրիկ Ռայդերի չորեքշաբթի տարածած հայտարարությունում։
«Նախարար Օսթինը Գալանտի հետ հեռախոսազրույցում ընդգծել է, որ այս ողբերգությունը կդժվարացնի օգնության ցուցաբերումը»,- նշված է տեքստում։ Ռայդերն ավելացրել է, որ Պենտագոնի ղեկավարը հայտնել է ԱՄՆ անհանգստության ուժեղացման մասին Ռաֆահ քաղաքում ցամաքային հնարավոր գործողության հետ կապված։
Օսթինը հայտնել է նաեւ կոնկրետ միջոցների ձեռնարկման անհրաժեշտության մասին, որպեսզի ապահովվի հումանիտար կազմակերպությունների աշխատակիցների անվտանգությունը։ Նա կոչ է արել իսրայելական կողմին թափանցիկ հետաքննություն կատարել, որպեսզի մեղավորները պատասխանատվության ենթարկվեն։
Ապրիլի 2-ին WCK կազմակերպությունը տեղեկություն է ստացել իր աշխատակիցների զոհվելու մասին նրանց ավտոմեքենային հասցված հարվածի պատճառով, երբ նրանք գտնվում էին Գազայի հատվածի կենտրոնական մասում։ Զոհվել է WCK յոթ աշխատակից՝ մեկ պաղեստինցի, Ավստրալիայի, Լեհաստանի, Մեծ Բրիտանիայի քաղաքացիներ եւ ԱՄՆ եւ Կանադայի երկակի քաղաքացիություն ունեցող մեկ կամավոր։
Իսրայելի Պաշտպանության բանակը տեղեկացրել է «միջադեպը ստուգելու մասին, որը հանգեցրել է մարդկանց ողբերգական մահվան»։ Բանակի ներկայացուցիչ Դանիել Հագարին ցավակցություն է հայտնել WCK ղեկավարությանը եւ այն երկրներին, որոնց քաղաքացիները զոհվել են։ Նա հայտնել է, որ ՑԱԽԱԼ-ը ձգտում է պարզել բոլոր հանգամանքները եւ ներկայացնել այն եզրակացությունները, որոնց կհանգի։