![](img/news/82/16/01/default.jpg)
Ֆինլանդիայի պաշտպանության նախարար Անտի Հականենը Yle պարբերականին հայտնել է, որ Ֆինլանդիան տրոտիլ պայթուցիկներ արտադրող գործարան է կառուցում։
«Անհրաժեշտ է զգալիորեն ավելացնել պայթուցիկների արտադրությունը։ Ուստի մենք պետք է լրջորեն դիտարկենք նաև հայրենական արդյունաբերության դերն այս հարցում»,- ասել է Հականենը Yle-ին։
Ըստ նրա, տրոտիլի արտադրության գործարանի մասին երկխոսություն է տեղի ունեցել գործարար աշխարհի, մասնավոր ներդրողների և պաշտպանական արդյունաբերության շուկայի հետ։
Նախարարը հայտնել է, որ Ֆինլանդիան իր դաշնակիցներին պարզաբանել է արագ որոշումների կայացման կարևորությունը։ Ռուսաստանը պատրաստ է երկարատև պատերազմի, և դա բարձր մակարդակի վրա է պահում պայթուցիկների պահանջարկը։
«Որոշումները պետք է հիմա կայացվեն, որ մեկ-երկու տարի հետո արտադրանքը թողարկվի»,- նշել է նախարարը։
Ֆիննական լրատվամիջոցն ընդգծում է, որ Ուկրաինայում երեք տարի շարունակվող պատերազմն Արևմուտքում ամբողջովին վերահսկողությունից դուրս է բերել տրոտիլ պայթուցիկների պահանջարկը։
Տրոտիլը ավանդական պայթուցիկ է, որն օգտագործվում է հիմնականում հրետանայինև ականանետային արկերի մեջ: Դրա զանգվածային արտադրությունը զգալիորեն ավելի էժան է, քան ավելի նոր պայթուցիկը:
Ներկայումս Եվրոպայում տրոտիլ պայթուցիկների առկայությունը համարվում է գրեթե կրիտիկական։ ԵՄ տարածքի միակ գործարանը գտնվում է Լեհաստանում, սակայն արտադրությունը բավարար չէ բարձր պահանջարկը բավարարելու համար: