![](img/news/82/16/81/default.jpg)
Պաղեստինյան ՀԱՄԱՍ-ը կարող է դադարեցնել բանակցություններն Իսրայելի հետ Ռաֆահ ներխուժման սպառնալիքի պատճառով, Ռաֆահը գտնվում է Գազայի հատվածի հարավում։ Այս մասին տեղեկացրել է Al Mayadeen հեռուստաալիքը՝ հղում կատարելով պաղեստինյան դիմադրության ուժերում ունեցած աղբյուրին։
«Վերջին իրադարձությունների համատեքստում, երբ [իսրայելական] օկուպացիոն ուժերը սպառնում են լրիվ կամ մասնակի ներխուժել Ռաֆահ, ՀԱՄԱՍ շարժումը կարող է ընթացիկ բանակցությունները դադարեցնելու գիծ վերցնել»,- ասել է աղբյուրը։ Նրա խոսքով՝ իսրայելական կողմին չի հաջողվի Ռաֆահն օգտագործել որպես բանակցային գործընթացում ՀԱՄԱՍ-ի վրա ճնշում գործադրելու լծակ։
Երկուշաբթի The Times of Israel թերթը տեղեկացրել է, որ Իսրայելի Պաշտպանության բանակը սկսել է խաղաղ բնակչության տարհանումը Ռաֆահի արեւելյան թաղամասերից, նախատեսված ռազմական գործողության պատրաստման շրջանակում։ Նրա տեղեկություններով՝ զինվորականները կոչ են անում պաղեստինցիներին հեռանալ Ռաֆահի արեւելյան թաղամասերից, որոնք գտնվում են իսրայելական սահմանից ոչ հեռու, Գազայի հատվածի հարավային մաս նախատեսված հարձակման շեմին։ Խաղաղ բնակիչներին առաջարկում են տեղափոխվել հումանիտար գոտի Ալ-Մավասիում եւ Խան Յունիսում։
Մայիսի 5-ին «Ալ-Կահիրա ալ-Իհբարիա» եգիպտական հեռուստաալիքը, հղում կատարելով բարձրաստիճան աղբյուրին, տեղեկացրել էր, որ Կահիրեում ընթացող բանակցությունների վերջին փուլի մասնակիցները հասել են «լուրջ առաջընթացի»։ Ալիքի զրուցակցի տեղեկացմամբ՝ «եգիպտական պատվիրակությունը ՀԱՄԱՍ-ի ներկայացուցիչների հետ քննարկել է բոլոր անհրաժեշտ մանրամասները, եւ շուտով կազմակերպության անդամները կհեռանան Կահիրեից։ Սպասվում է, որ առաջիկա երկու օրերին նրանք կվերադառնան Եգիպտոսի մայրաքաղաք եւ «կներկայացնեն վերջնական պատասխանն առաջարկին»։ Այլ մանրամասներ խորհրդակցությունների ընթացքի եւ արդյունքների մասին չեն նշվում։