Ավագանու հերթական նիստի ժամանակ ընդդիմադիր «Մայր Հայաստան» դաշինքի անդամները, «Դե՛մ ենք միակողմանի զիջումներին» գրությամբ թղթեր պարզելով, բոյկոտեցին ավագանու նիստը, ապա դուրս եկան դահլիճից:
Արձագանքելով փոխքաղաքապետ Արմեն Փամբուխչյանն ասաց. «Հասկանալի է՝ ընդդիմադիր գործիչների վարքագիծը, երբ մարդ հաջողություն չի ունենում, անընդհատ փորձում է ամեն ինչ օգտագործել, որպեսզի ինչ-որ չափով ուշադրություն գեներացնի: Բայց դա չի հաջողվում, որովհետև ասելիքն ամբողջությամբ հիմնված է կեղծիքի վրա:
«Իրենք ինչ են անում՝ փողոցներում ման են գալիս, անգամ սրճարաններում մոտենում են մարդկանց ու սկսում մատ թափ տալ, թե ինչու այս կամ այն մարդը չի միանում: Ժողովուրդ ջան, ձեր վարքագծով ոչ ոք չի միանալու ձեզ, պայքարի միանում են այն ժամանակ, երբ մարդը հասկանում է խնդրի բովանդակությունը, թե ինչի մասին է այդ պայքարը և հավատում է այդ պայքարի ղեկավարությանը՝ հարթակին կանգնած մարդկանցից սկսած:
Բայց ի՞նչ եք անում դուք, դուք ընդամենը հարթակից էթնիկ զտման եք ենթարկում ՀՀ քաղաքացիներին, և հեռու չի այն օրը, երբ դուք գուցե ասեք՝ հայ լինելու համար Հայկ Նահապետից տեղեկանք բերեք: Սա էթնիկ զտման դասական դրսևորում է, և դա հնչել է ձեր հարթակից, և այդ հարթակին, բնականաբար, ոչ ոք չի հավատալու, որովհետև ՀՀ-ն անկախ, ժողովրդավարական, իրավական, սոցիալական պետություն է, որտեղ բոլոր քաղաքացիները, անկախ ազգությունից, ունեն հավասար իրավունքներ»,- ասաց Փամբուխչյանը:
Վերջինս նաև նկատեց՝ լավ է, որ ընդդիմադիրները այս դեմոստրացիան արեցին. «Ձեր ղեկավարության մոտ պլյուս կդնեք, բայց քաղաքացիների մոտ ևս մեկ մինուս ունեցաք»:
