![](img/news/82/56/02/default.jpg)
Իսրայելական ուժերը հարվածել են Թել-էս-Սուլթան շրջանի վրանաճամբարին (Ռաֆահի հյուսիս-արեւմուտք), որտեղ գտնվում էին տեղահանված անձինք, զոհվել է առնվազն 35 պաղեստինցի։ Զոհերի մեջ շատ են կանայք եւ երեխաները։
Al Jazeera հեռուստաալիքն իր հերթին տեղեկացրել է, որ հարձակումը Թել-էս-Սուլթան շրջանում տեղի է ունեցել Ջաբալիա եւ Նուսեյրաթ ճամբարների, ինչպես նաեւ Գազա քաղաքի ռմբակոծությունների հետ միաժամանակ։ Վերջին 24 ժամում զոհվել է առնվազն 160 մարդ։
Աելի ուշ WAFA լրատվական գործակալությունը նշել է, որ զոհերի թիվը Իսրայելի հարվածների հետեւանքով ավելացել է՝ հասնելով 40-ի։ Զոհերի մեծ մասը կանայք եւ երեխաներ են։
Գործակալությունը հայտնել է, որ առնվազն ութ հրթիռ ընկել է վրանաճամբարի վրա։ Գրոհի հետեւանքով հրդեհ է սկսվել, եւ շատ մարդիկ, որոնք վրաններում էին, ողջ-ողջ այրվել են։
Պաղեստինի Կարմիր մահիկի ընկերությունը տեղեկացրել է, որ հիվանդանոցներն այս շրջանում «ի վիճակի չեն սպասարկել վիրավորների եւ տուժածների այսքան մեծ քանակության՝ օկուպացիոն ուժերի կողմից Գազայում առողջապահության համակարգը միտումնավոր կործանելու պատճառով»։