Իրանում Նաթանզի գործարանում 20%-ի մակարդակով 90-ից 100 կգ ուրան են հարստացրել: Այս մասին հայտնել է Իրանի ատոմային էներգիայի կազմակերպության (ԻԱԷԿ) նախագահ Ֆերեյդուն Աբբասին:
Նա նշել է, որ արտադրությունը կատարվել է ԱԷՄԳ–ի մասնագետների հսկողության ներքո, ինչպես նաեւ հայտարարել է, որ ուրանի հարստացման ազգային մասնագետների ակտիվ աշխատանքների հետ կապված, գործարանում իրանական նվազ հարստացված ուրանը բարձր հարստացված ուրանով փոխարինելու անհրաժեշտությունը չկա, հայտնում է ԻՍՆԱ-ն:
Հիշեցնենք, որ փետրվարի 15-ին Իրանի պետական հեռուստաընկերությունը հայտնել է այն մասին, որ իրանական մասնագետները երկրի նախագահ Մահմուդ Ահմադինեջադի ներկայությամբ սկսել են սեփական արտադրության ջերմանջատիչ տարրերի բեռնումը Թեհրանի գիտահետազոտական ռեակտորում: Հարստացման մակարդակը կազմում է 20%:
Ավելի վաղ այլ երկրներ հրաժարվել էին միջուկային վառելիք մատակարարել Թեհրանին: