Շրջանառվող լուրերի համաձայն, Հայաստանի պարի պետական անսամբլի գլխավոր բալետմայստեր Ասատուր Կարապետյանին անսամբլի փորձերից մեկի ժամանակ պարախմբի տղաները ծեծել են՝ տգեղ արտահայտություն թույլ տալու համար: Այնինչ` NEWS.am-ի թղթակցի հետ զրույցում, թե’ Ասատուր Կարապետյանը, թե’ պարի պետական անսամբլի գլխավոր տնօրեն Էրիկ Չանչուրյանը այդ լուրերը հերքեցին: Վերջինս նշեց, որ չգիտի, թե նման լուրերի միջոցով ինչի են ցանկանում հասնել, քանի որ կոլեկտիվի հետ շատ լավ հարաբերությունների մեջ է այդպիսի բան չկա, չի էլ եղել:
Հայաստանի պարի պետական անսամբլի գլխավոր բալետմայստեր Ասատուր Կարապետյանն էլ հավաստիացրեց, որ փորձերը ջերմ մթնոլորտում են անցնում ե’ւ տղաների, ե’ւ աղջիկների հետ: «Թե դա ում արած գործն է, ում պատվերն է, ես չգիտեմ: Ես հերքում եմ այդ լուրերը: Դուք կարող եք վաղը ժամը 12.00-ից մինչեւ 13.00-ն մեր փորձերին գալ եւ տղաներից ու աղջիկներից հետաքրքրվել, թե եղե՞լ է նման բան, թե` ոչ: Եթե ասեն եղել է, նոր կգրեք»,- ավելացրեց Ասատուր Կարապետյանը:
Նա համոզված է, որ այն պատվիրված է: «Ինձ թվում է , որ սա պատվեր է, բայց թե ում կողմից է, ուզում եմ դա իմանալ: Այդ ո՞վ է այդքան մտահոգված պարի պետական անսամբի համար, որ այդպիսի սուտ տեղեկություններ է լրատվամիջոցներին տալիս»,- ավելացրեց Ասատուր Կարապետյանը: Խոսելով ձեռնարկվելիք քայլերից նա նշեց, որ անտեսելու է այդ ամենը եւ չի ցանկանում խառնվել նման կեղծ լուրերի մեջ, քանի որ ինքը մաքուր է: