Գիտության պատմության մեջ շատ չեն այնպիսի հայտնագործությունները. որոնց հետ մարդն առնչվում է ամեն օր: Բայց գերմանացի ֆիզիկոս Հենրիխ Ռուդոլֆ Հերցի հայտնագործությունները հենց այդպիսին են, դրանք միշտ շրջապատում են մեզ: Ռադիոն եւ հեռուստատեսությունը, որոնք առաջացել են հեց նրա բացահայտումների շնորհիվ, մեր կենցաղի անհրաժեշտ մասն են կազմում:
Այսօր լրանում է Հերցի ծննդյան 155-ամյակը: Google-ը տոնական տարբերանշան է պատրաստել` իր սովորական լոգոտիպը փոխարինելով տատանվող ալիքով, որի գոյությունը ժամանակին ապացուցել էր Հերցը:
Հերցը ծնվել է 1857թ. փետրվարի 22-ին: Ավարտել է Բեռլինի համալսարանը, որտեղ նրան դասավանդել են Հերման ֆոն Հելմհոլցը եւ Գուստավ Կիրխհոֆը: Այնուհետեւ ինքն է սկսել դասավանդել Կարլսրուհեի համալսարանում, ապա` Բոննում:
Հերցի գիտական հիմնական ձեռքբերումը Ջեյմս Մաքվելի լույսի էլեկտրամագնիսական տեսությունը փորձով ապացուցելն էր: Հերցն առաջինն է ապացուցել էլեկտրամագնիսական ալիքների գոյությունը, ինչպես նաեւ այն, որ դրանք տարածվում են լույսի արագությամբ, եւ որ լույսը ոչ այլ ինչ է, եթե ոչ էլեկտրամագնիսական ալիքների տարատեսակ: Հերցի ստացած արդյունքներն ընկած են ռադիոյի հիմնադրման հիմքում:
Հերցի պատվին 1933թ. անվանել են հաճախականության չափման միավորը, որն այժմ ընդգկված է միավորների չափման միջազգային համակարգում: