Հանրային խորհրդի նախագահ Վազգեն Մանուկյանը կոչ է անում Երեւանի քաղաքապետարանին՝ դադարեցնել Մաշտոցի այգում ընթացող շինարարությունը, մինչեւ ճշտվեն դրա իրավական հիմքերը: Այս մասին այսօր՝ փետրվարի 23-ին, Հանրային խորհրդում տեղի ունեցած քննարկմանն ասաց նա՝ հավելելով, որ այդ խնդիրը կբարձրացնեն նաեւ Կառավարությունում, ՀՀ նախագահի մոտ:
Ի պաշտպանություն Մաշտոցի այգու բողոքի ակցիաներ կազմակերպող երիտասարդները ներկա չէին քննարկմանը, քանի որ չեն վստահում իշխսնություններին եւ մտավախություն ունեն, որ իրենք այգուց դուրս գան, ապա այդտեղ նորից կսկսվի շինարարությունը: Միեւնույն ժամանակ, բնապահպան Կարինե Դանիելյանը ներկայացրեց երիտասարդների հիմնավորումները եւ նրանց հարցերը: Այսպես, երիտասարդները չեն ցանկանում, որ Մաշտոցի այգին վերանա, քանի որ այն քաղաքի եզակի այգիներից մեկն է, այդտեղ կա երկու հիվանդանոց, եւ սա նրանք համարում են «վերջին ռուբիկոնը», որը չեն զիջելու:
Խոսելով իրավական հիմքերի մասին՝ Երեւանի քաղաքապետարանի իրավաբանական վարչության պետ Զավեն Առաքելյանը նշեց, որ Աբովյան փողոցում եղել են կրպակներ, որոնք չեն ունեցել գրանցված փաստաթղթեր, բայց կան այնպիսիք, որոնց գործողության ժամկետը հինգ-յոթ տարի է եւ ունեն գրանցված իրավունքներ:
Երեւանի ավագանու անդամները՝ Դերենիկ Դումանյանը, Աստղիկ Գեւորգյանը եւ այլք եւս ներկա էին քննարկմանը: Դերենիկ Դումանյանը նշեց, որ այս հարցը իրենց հետ կապ չունի, սա եղել է քաղաքապետարանի գործադիր մարմնի որոշմամբ:
Հանրային խորհրդի անդամ Խորով Հարությունյանն առաջարկեց կրպակատերերի գումարով փոխհատուցել, իսկ Երեւանի գլխավոր ճարտարապետ Նարեկ Սարգսյանը հակադարձեց, որ դա շատ ավելի բարդ է, քանի որ այդքան բյուջե չունի քաղաքապետարանը: