Լիբիայի հարավ-արեւելքում Սուդանի եւ Չադի սահմանին գտնվող Կուֆրա քաղաքի համար մարտեր են ընթանում թշնամի երկու ցեղախմբերի միջեւ: Հենց այդ սահմանային քաղաքով են անցնում Աֆրիկական երկրներից մաքսանենգ ճանապարհով ներկրված թմրանյութերն ու ապրանքները:
Փետրվարի 24-ին Անցումային ազգային խորհուրդն իր զորքերն ուղարկել էր այնտեղ, սակայն արդեն երկու շաբաթ շարունակվող հակամարտությանը վերջ դնել չէր հաջողվել, հաղորդում է vesti.ru-ն: Երկու կողմն էլ հսկայական վնասներ է կրում, զոհերի թիվը հարյուրների է հասնում, Տրիպոլիի եւ հարեւան քաղաքների հիվանդանոցները չեն հասցնում ընդունել հիվանդներին:
Ինչպես գրել էր NEWS.am-ը, փետրվարի 21-ից Կուֆրա քաղաքում դաժան բախումներ են տեղի ունենում ալ Զավիա եւ Թաբու ցեղերի միջեւ: Ըստ ականատեսների` կիրառվել են ականանետներ, հրթիռային սարքեր եւ ինքնաձիգներ:
Անցումային ազգային խորհրդի նախագահ Մուսթաֆա Աբդել Ջալիլը հայտարարել է, որ ԱԱԽ-ը դեռեւս ի վիճակի չէ վերահսկելու երկիրը: