Ղազախական ընդդիմությունը Ալմաթիում հերթական չարտոնված հանրահավաք անցկացնելու փորձն է կատարել: Հանրապետության պալատի դիմացի հրապարակը հանրահավաքի մասնակիցներին դիմավորել է ոստիկանական շղթայով եւ մետաղյա արգելապատնեշներով:
Հանրահավաքն սկսվելուց կես ժամ առաջ հայտնի է դարձել, որ Ղազախստանի ընդդիմադիր Համազգային սոցիալ-դեմոկրատական կուսակցության (ՀՍԴԿ) մի քանի առաջնորդներ` Բոլաթ Աբիլովը, Ամիրժան Կոսանովը, Ժարմախին Թույաքբայը եւ մի քանի այլ ակտիվիստներ կուսակցության շտաբում ձերբակալվել են չարտոնված հանրահավաք կազմակերպելու համար:
Ցույցի ընթացքում ոստիկանները կիրառել են ամենաակտիվ ցուցարարներին ձերբակալելու ռազմավարությունը: Ձերբակալվածների թիվը համալրվել է, երբ ցուցարարները փորձել են ճեղքել ոստիկանների շրջափակումը եւ շարժվել ոստիկանության բաժանմունքի ուղղությամբ, որտեղ գտնվում էին իրենց առաջնորդները, հայտնում է Zakon.kz-ն:
Ըստ ոստիկանության տեղեկության` ձերբակալվել են ցույցի 7-8 մասնակիցներ, սակայն ըստ տեղական լրատվամիջոցների, ձերբակալվածները երկու անգամ ավելի շատ են: