Հոլիվուդյան հռչակավոր դերասան Ջորջ Քլունին ազատվել է` ոստիկանությունում մի քանի ժամ անցկացնելուց եւ 100 դոլարի չափով տուգանք վճարելուց հետո:
Լրագրողների հետ զրույցում դերասանը հայտնել է, որ դա իր կյանքում առաջին ձերբակալությունն էր, եւ հույս է հայտնել, որ վերջինը կլինի, հայտնում է Associated Press-ը:
Ինչպես ավելի վաղ հայտնել էր NEWS.am-ը, Ջորջ Քլունին մարտի 16-ին ձերբակալվել էր ԱՄՆ-ի մայրաքաղաք Վաշինգթոնում Սուդանի դեսպանատան մոտ` բողոքի ակցիայի ժամանակ:
Ակցիայի մասնակիցները բողոքում էին Սուդանի նախագահ Օմար ալ Բաշիրի դեմ, որին մեղադրում էին երկրում հումանիտար ճգնաժամ ստեղծելու եւ երկրի հարավային տարածքների բնակիչներին մթերքների առաքումը մերժելու մեջ:
Քլունիի հետ ձերբակալվել էին նաեւ նրա հայրը` Նիք Քլունին, կոնգրեսական Ջիմ Մորանը եւ NAACP-ի նախագահ Բենջամին Ջելոսը: Ձերբակալման պատճառ է դարձել բողոքողների կողմից դեսպանատան մոտի ոստիկանական ցանկապատն անցնելը: