Վրաստանի պատրիարք Իլիա Երկրորդի ուղերձը Ռուսաստանի վարչապետ Վլադիմիր Պուտինին, որում նա շնորհավորել էր վերջինիս նախագահի պաշտոնում ընտրվելու կապակցությամբ, երկու երկրների միջեւ «բանակցությունների սկիզբն» է: Նման տեսակետ է արտահայտել Վրաստանի նախկին նախագահ Էդուարդ Շեւարդնաձե:
«Ասավալ-Դասավալի» թերթին տված հարցազրությցում նա նշել է, որ Վրաց ուղղափառ եկեղեցու առաջնորդը «իմաստուն է վարվել»` հղելով այդ ուղերձը, որում նաեւ ասվում էր, որ Վրաստանը չի հաշտվում Աբխազիայի եւ Հարավային Օսիայի կորստի հետ: Վրաստանի նախկին նախագահի խոսքով` այդ ուղերձին «անպայման կհաջորդի երկու երկրների դիվանագետների հանդիպումը»:
Էդուարդ Շեւարդնաձեն մյուս փուլում «հնարավոր» է համարում նաեւ Վրաստանի եւ Ռուսաստանի ղեկավարների հանդիպումը, սակայն վրացական կողմից, հնարավոր է, ներկայիս նախագահ Միխայիլ Սահակաշվիլին չլինի: Նրա խոսքով` շատ բան է կախված Վրաստանում հոկտեմբերին կայանալիք խորհրդարանական ընտրություններից, եւ եթե իշխանության գա ընդդիմադիր միլիարդատեր Բիձինա Իվանաշվիլին, ապա նրա համար շատ ավելի հեշտ կլինի Ռուսաստանի հետ կապեր հաստատելը, բանակցություններ սկսելը, արդյունքի հասնելը»: «Գլխավորը առանց նախապայմանների բանակցություններ սկսելն է», - ասել է նա, գրում է «Վզգլյադ» թերթը:
