Կոկա-կոլայի բաղադրության մեջ մտնող «կարամել» գունանյութը եղել է, կա եւ կլինի անվտանգ բաղադրիչ: Այդ մասին նշված է «Կոկա Կոլա» ընկերության այսօր` մարտի 19-ին տարածած հաղորդագրության մեջ:
Ընկերությունը նշել է, որ կարամելը սննդային ամենահին բնական նյութերից է. այն լայնորեն օգտագործվում է ըմպելիքներում եւ տարբեր սննդատեսակներում, այդ թվում` թխվածքներում, հացում, հացամթերքում, նախաճաշի շիլաներում, շոկոլադներում, հրուշակեղենում, դեսերտային խառնուրդներում, պաղպաղակներում, սոուսներում, երշիկեղենում, քաղցրեղենում, ալկոհոլային ըմպելիքներում եւ քացախում:
Միեւնույն ժամանակ` «Կոկա Կոլա» ընկերությունն անհամաձայնություն է հայտնել Կալիֆորնիա նահանգի այն որոշման հետ, ըստ որի 4-MEI պարունակող որոշակի սննդամթերքների վրա անհրաժեշտ է նախազգուշական մակնշում կատարել:
Հիշեցնենք, որ Ամերիկյան «Գիտության նվաճումները հասարակության օգտին կիրառման կենտրոն» (CSPI) կազմակերպության մասնագետները դիմել են ԱՄՆ-ի վերահսկիչ մարմիններին` սննդի արդյունաբերության մեջ կիրառվող ներկանյութերը ճանաչվել որպես քաղցկեղածին եւ արգելել դրանք: Մասնավորապես` նրանք ուշադրություն էին դարձրել կոկա կոլայի բաղադրության վրա:
