Շվեյցարիայում տեղի ունեցած սոսկալի ավտովթարից տուժած 15 երեխաներ դեռ գտնվում են հիվանդանոցներում: Տեղի լրատվամիջոցների փոխանցմամբ, 12 երեխաներ գտնվում են Բելգիայի Լեվեն քաղաքի համալսարանական հիվանդանոցում: Առավել ծանր վնասվածքներ ստացած երեք երեխաներ, դեռ Շվեյցարիայի Լոզան քաղաքի հիվանդանոցում են:
Մարտի 17-ին Լեվենի հիվանդանոցը լքել են երեք երեխաներ, իսկ մոտ օրերս, ըստ բժշկի, եւս մի քանի երեխաներ դուրս կգրվեն:
Հիշեցնենք, որ վթարը տեղի էր ունեցել մարտի 13-ի երեկոյան` Վալեի Սյեր քաղաքի շրջակայքում: Ավտոբուսն անհայտ պատճառով կորցրել էր կառավարումը եւ բախվել թունելի պատին: Պատահարի զոհ էին դարձել 28 մարդ, որոնցից 22-ը` երեխաներ: Ավելի քան 20 երեխա ստացել էր ծանրության տարբեր աստիճանի վնասվածքներ, նրանցից երկու աղջնակ նախկինի պես գտնվում են արհեստական կոմայի վիճակում:
Մարտի 16-ին ռազմական ավիափոխադրամիջոցով Շվեյցարիայից Բելգիա են ժամանել պատահարից տուժած 20 երեխա, եւս 8-ը տեղափոխվել էին մեկ օր առաջ:
Մահացած երեխաների հուղարկավորությունը տեղի կունենա մարտի 21-ին եւ 22-ին: