Աբխազիայի 20 ընտրատարածքներում մարտի 24-ին անցակացվում է խորհրդարանական ընտրությունների երկրորդ փուլի քվեարկություն:
Երկրորդ փուլ անցած թեկնածուների թիվը 40 է` ընդդիմադիր «Աբխազիայի ժողովրդական ֆորում» կուսակցության վեց ներկայացուցիչ, «Միասնական Աբխազիա» կուսակցության երեք թեկնածու, «Տնտեսական զարգացման կուսակցության» մեկ թեկնածու, մնացած 30-ն առաջադրվել են նախաձեռնող խմբերի կողմից: Նրանցից 10-ը գործող խորհրդարանականներ են, հաղորդում է ԻՏԱՌ-ՏԱՍՍ-ը:
Հիշեցնենք, որ մարտի 10-ին կայացած առաջին փուլի ժամանակ հաղթողներ էին եղել 35 ընտրատարածքներից 13-ում:
Առաջադրված հայազգի 9 թեկնածուներից խորհրդարան են անցել արդեն Վաղարշակ Քոսյանը եւ Ռոբերտ Յայլյանը:
Երկրորդ փուլում ընտրված է համարվում այն թեկնածուն, ով ստացել է ձայների պարզ մեծամասնությունը: