Ուկրաինայի վարչապետ Նիկոլայ Ազարովն Ադրբեջանին առաջարկել է մասնակցել «Վիկինգ» նախագծի շրջանակում Սեւ-Բալթիկ ծովերի տրանսպորտային միջանցքի աշխատանքներին: Առաջարկությունը նա կատարել է ադրբեջանցի գործընկեր Արթուր Ռասիզադեի հետ Բաքվում բանակցություների ընթացքում:
Ըստ նրա` այդ նախագծում Ադրբեջանի մասնակցությունը մի կողմից հնարավորություն կտա շարունակել այդ միջանցքը Կենտրոնական Ասիայի ուղղությամբ, իսկ մյուս կողմից Ադրբեջանին թույլ կտա դուրս գալ Մերձբալթիկա, Բելառուս եւ եվրոպական այլ երկրներ, հաղորդում է «Ինտերֆաքս-Ուկրաինան»:
Ուկրաինան, Մոլդովան, Լիտվան եւ Վրաստանը մտադիր են աշխատել Բալթիկ ծով-Սեւ ծով ուղղությամբ փոխադրումների ազդեցության բարձրացման վրա` «Վիկինգ» համակցված գնացքի եւ գործող երկաթուղային շոգեքարշային փոխադրումների օգտագործմամբ:
«Վիկինգ» համակցված գնացքն անցնում է Ուկրաինայով, Բելառուսով եւ Լիտվայով եւ միացնում է Բալթիկ տարածաշրջանի ծովային բեռնատար ուղիների շղթան Սեւ, Միջերկրական եւ Կասպից ծովերի նմանատիպ համակարգի հետ: Նրա երթուղու ընդհանուր երկարությունը 1753 կմ է:
Այժմ ավարտվում են բոլոր անհրաժեշտ ընթացակարգերը Վրաստանի եւ Մոլդովայի ուղղությամբ Բալթիկ ծով - Սեւ ծով բեռնափոխադրումների համաձայնագրին միանալու համար:
