Որեւէ արատավոր երեւույթի մեջ, որի մեջ կրիմինալ կա, ես չէի կարող կապ ունենալ, քանի որ աշխատել եմ ազնիվ ու խիղճս հանգիստ է, ով ինչ կուզի թող գրի: Այս մասին NEWS.am-ի թղթակցի հետ զրույցում ասաց ՀՀ նախկին ոստիկանապետ, ՀՀ նախագահի խորհրդական Ալիկ Սարգսյանն` արձագանքելով մամուլում տեղ գտած հրապարկումներին եւ մեղադրանքներին:

Նշենք, որ, ըստ մամուլի հրապարկումների, ՀՀ ոստիկանության զորքերի հրամանատար Գարեգին Գաբրիելյանի պաշտոնանկության պատճառը նրա թույլ տված չարաշահումներն են, ինչի առթիվ ՀՔԾ-ում քրեական գործ է քննվում: Նշվում է, որ Գաբրիելյանն իր ենթակաների հետ միասին զենք-զինամթերք եւ զինտեխնիկայի պահեստամասեր է վաճառել, իսկ քրեական գործի «կծիկն» այնքան է բացվել, որ հասել է մինչեւ ՀՀ նախկին ոստիկանապետ Ալիկ Սարգսյանին: Անգամ նրա կալանավորման հարցն է դրվել, ինչը, սակայն, Սերժ Սարգսյանը թույլ չի տվել` ասելով, թե այս ընթացքում ցնցումներ պետք չեն:

Այս խնդիրների շուրջ զրուցեցինք Ալիկ Սարգսյանի հետ:

Պարոն Սարգսյան, ծանոթ եք հրապարկմանը, ինչպե՞ս կարձագանքեք Ձեզ առաջադրված մեղադրանքներին:

Դա այնքան լկտի հերյուրանք ա, վիրավորվում եմ ուղղակի: Բա անհարմար չի՞, կարելի՞ է զրպարտել մարդուն անիմաստ տեղը: Ես ինչ կապ ունեմ, ես ինչ գիտեմ Գաբրիելյան Գարեգինին ինչի՞ են հանել, ոչ էլ ուզում եմ հետաքրքրվել: Ինձ չի հետաքրքրում, ես ոստիկանության հետ հիմա ընդհանրապես կապ չունեմ: Մի բան գիտեմ, որ ես կապ չէի կարող ունենալ: Ես, որեւէ արատավոր երեւույթի մեջ, որի մեջ կրիմինալ կա, չէի կարող կապ ունենալ, քանի որ աշխատել եմ ազնիվ ու խիղճս հանգիստ է, ով ինչ կուզի թող գրի:

Ասում են, որ Սերժ Սարգսյանը թույլ չի տվել, որ ձեզ կալանավորեն այս ընթացքում ցնցումներից խուսափելու համար:

Նորից կարող եմ կրկնել, որ ինչ մեղադրանք իմ հասցեին հնչեցվել է, բոլորը զրպարտանք է: Ես կապ չունեմ, ոչ մի բանի հետ: Նույնիսկ չեմ ցանկանում հիմա մանրանալ Գաբրիելյան Գարիկի եւ մյուսների մասին խոսել, քանի որ կապ չունեմ, հավատացեք կապ չունեմ: Եթե կապ ունենայի հավատացեք, որ վաղուց էի պատժվել: Չկասկածեք:

Այս դեպքում որտեղի՞ց ինֆորմացիոն նման արտահոսքը:

Ինչ-որ մեկը դա կազմակերպում է, ես հասկանում եմ: Ինչ-որ մեկը մի բան բերում հասցնում է տեղ: «Միամիտ» սեղանի շուրջ ինչ-որ բաներ են ասում, որ թերթերում դա արձագանք է ստանա միայն իմ անունը շոշափելու համար, այն էլ վարկաբեկելու նպատակով, ինչի չեմ հասկանում: Ինչ-որ ուժ է իմ դեմ աշխատում, բայց, թե ով` դեռեւս չգիտեմ:

Կասկածներ էլ չունե՞ք, թե ինչ ուժեր են:

Ես ուղղակի ասում եմ, որ որեւէ բանի հետ առնչություն չունեմ: Ես աշխատել եմ ազնիվ, մաքուր: Հետագայում ինչ կպարզվի, ով ինչի համար պատասխան կտա, հավատացեք, ես կապ չունեմ եւ չեմ կարող ունենալ:

Իսկ ի՞նչ կասեք ՀՔԾ-ում քննվող գործի մասին:

Ասում եմ, որ դա չոր հերյուրանք է: Իմաստը հասկանում եք չէ` ընդհանրապես ինձ հետ չքսվող բան է: Ինչ-որ մեկի ֆանտազիան է: Հավատացեք: Ինձ երբեւիցե, որեւիցե մեկը այդ հարցով նույնիսկ չի ակնարկել: Իսկ ես էլ չէի կարող, որեւիցե կեղծ փաստաթուղթ ստորագրած լինեի դա բացառված է:

Զրուցեց Տաթեւ Մեսրոպյանը