նախընտրելի դարձնելՀայաստանում խորհրդարանական ընտրությունների արդյունքները պետք է ճանաչվեն անվավեր՝ համակարգային խախտումների և մի շարք ընտրատեղամասերում վերաքվեարկություն անցկացնելու անհրաժեշտության պատճառով։ Այս մասին այսօր՝ հունիսի 14-ին, Հայաստանի ԿԸՀ շենքի մոտ լրագրողների հետ զրույցում հայտարարել է «Ուժեղ Հայաստան» դաշինքից պատգամավորի թեկնածու Դավիթ Ղազինյանը։
Նա ընդգծել է, որ Կենտրոնական ընտրական հանձնաժողով են ներկայացվել հիմքեր, որոնք ակնհայտորեն ապացուցում են ընտրությունների արդյունքներն անվավեր ճանաչելու անհրաժեշտությունը։
Ըստ ընդդիմադիր գործչի, ընդդիմության հիմնական պահանջը մնում է վերաքվեարկություն անցկացնելը, սակայն նա կասկած է հայտնել, որ այն կնշանակվի։ «Ես չեմ հավատում, որ նրանք դա կանեն։ Վերաքվեարկության համար անհրաժեշտ է անկախ մարմին, իսկ ես չեմ հավատում, որ այդպիսին գոյություն ունի», — ասել է Ղազինյանը։
Նա նաև կոշտ է արձագանքել ընդդիմության հասցեին ընտրակաշառքի վերաբերյալ իշխանությունների մեղադրանքներին։
«Եթե մարդը ինչ-որ բան է պնդում և ի վիճակի չէ դա ապացուցել, ապա նման հայտարարությունները նույնիսկ լսելու արժանի չեն։ Դա ոչ տղամարդկային է, ոչ էլ մարդկային։ Թող ապացույցներ ներկայացնեն, եթե խոսում են ընտրակաշառքի մասին։ Հակառակ դեպքում դրանք պարզապես դատարկ խոսքեր են», - նշել է պատգամավորի թեկնածուն։
Նա ընդգծել է, որ գործող իշխանությունը չի ապահովել ընտրությունների ազնիվ արդյունք։
«Մենք համոզված ենք, որ գործող իշխանությունը, չնայած վարչական ռեսուրսին և ճնշմանը, այս ընտրություններում չի հաղթել», - ասել է ընդդիմության ներկայացուցիչը։
