Ճապոնական Toyota ավտոարտադրողը պատրաստվում է վերադարձնել MR2 և Celica սպորտային մոդելները՝ միաժամանակ GR ստորաբաժանումը վերածելով ինքնուրույն սպորտային բրենդի, հայտնում է Autocar-ը։

Ընկերության նոր ռազմավարությունը նախատեսում է սպորտային ավտոմեքենաների սիրահարների համար նախատեսված մոդելաշարի ընդլայնում, այդ թվում՝ բենզինային և հիբրիդային ուժային ագրեգատներով աշխատող մոդելների ստեղծում։

GR ստորաբաժանումը, որը ձևավորվել է Gazoo Racing մրցարշավային թիմի հիման վրա, այսօր թողարկում է Yaris-ի, Supra-յի և 86-ի սպորտային տարբերակները։ Այնուամենայնիվ, Toyota-ն մտադիր է GR-ը հասցնել ինքնուրույն ապրանքանիշի մակարդակի՝ այն համադրելի դարձնելով BMW M-ի կամ Mercedes-AMG-ի հետ։ GR-ի տարբերանշանը կրող առաջին մոդելը կլինի GR GT սուպերքարը, որից հետո դրան կմիանան նոր սպորտային ավտոմեքենաները։

Առանցքային նախագծերից մեկը կլինի վերածնված Toyota MR2-ը՝ կենտրոնատեղակայված շարժիչով կոմպակտ սպորտային ավտոմեքենան, որը երկարամյա ընդմիջումից հետո կարող է վերադառնալ շուկա։ Դրան զուգահեռ, Toyota-ն պատրաստում է Celica-ի նոր սերունդը։ Սպասվում է, որ այն հիմք կծառայի ռալլիի աշխարհի առաջնությունում ընկերության հաջորդ մրցարշավային ավտոմեքենայի համար։

MR2-ի մշակումն արդեն լիաթափ ընթացքի մեջ է։ Toyota-ն փորձարկում է նախատիպը ձևափոխված GR Yaris-ի հենքի վրա, որտեղ շարժիչը տեղափոխվել է առջևի առանցքից հետ։ Թեստային ավտոմեքենան նույնիսկ մասնակցում է ճապոնական Super Taikyu մրցարշավային շարքին, ինչը ինժեներներին թույլ է տալիս իրական պայմաններում ստուգել նոր ուժային ագրեգատի հուսալիությունն ու բնութագրերը։

MR2-ի համար Toyota-ն մշակում է նոր 2,0 լիտրանոց չորս գլանային G20E շարժիչը։ Ստանդարտ տարբերակում այն կարող է զարգացնել մոտ 400–450 ձիաուժ, իսկ մրցարշավային ձևափոխումը՝ ավելի քան 600 ձիաուժ։ Ընդ որում, շարժիչն ի սկզբանե ստեղծվում է հիբրիդային և վերալիցքավորվող հիբրիդային համակարգերում օգտագործելու հնարավորությամբ։

Շարժիչի կենտրոնական տեղադրությունը պետք է լուծի հզոր առջևաշարժիչ մեքենաների գլխավոր խնդիրներից մեկը՝ առջևի դողերի գերբեռնվածությունն ու թերի կառավարելիության հակումը։ Նախատիպում շարժիչն աշխատում է լիաքարշակ համակարգի հետ, ընդ որում՝ համակարգն ընդունակ է վերաբաշխել քարշիչ ուժը առջևի և հետևի առանցքների միջև։ Սա թույլ է տալիս պահպանել MR2-ին բնորոշ ճկունությունն ու ճարպկությունը՝ միաժամանակ բարձրացնելով մեքենայի կայունությունը։

Toyota-ի ղեկավար Ակիո Տոյոդան, որը հայտնի է ավտոսպորտի հանդեպ իր սիրով և հանդես է գալիս Մորիզո կեղծանվամբ, անձամբ է մասնակցում նախատիպի փորձարկումներին։ Ընկերության ղեկավարների խոսքով՝ նոր մոտեցումը նշանակում է հրաժարում նախկին ռազմավարությունից։ Toyota-ն առաջին հերթին սկսել է կոմերցիոն տեսանկյունից շահավետ ավտոմեքենաներ թողարկել։ Այժմ ընկերությունը պատրաստ է ստեղծել նեղ մասնագիտացված մոդելներ, որոնք, թեև կարող են մեծ վաճառքներ չապահովել, բայց ձևավորում են բրենդի իմիջը։