Վիեննայի Ավետարանական հիվանդանոցի դիմածնոտային վիրաբուժության գլխավոր բժիշկ Կուրտ Վինցենցը փորձում է կամուրջ ստեղծել դեմքի վերականգնողական եւ կոսմետիկ վիրաբուժության միջեւ, փորձում է դրանք համադրել: 

Երեւանում Պլաստիկ վիրաբուժության միջազգային կոնգրեսի շրջանակում NEWS.am-ի թղթակցի հետ զրույցում Վինցենցը նշել է, որ բժշկության մեջ նոր ուղղություն է ձեւավորվել՝ վերականգնողական վիրաբուժություն, երբ գործառույթները, անատոմիան եւ  գեղագիտական տեսքը  վերականգնվում են միաժամանակ: 

Ըստ բժշկի՝ վիրահատվողների մեծամասնությունը կանայք են, եւ միայն մեկ երրորդն են տղամարդիկ: Դիմողների միջին տարիքը 45-ն է:

Բժիշկ Վինցենցի ամենատարեց հիվանդը 82-ամյա մի կին է եղել: Նրան ախտորոշել էին՝  «ծերացող դեմքի ախտանիշ»: Կինը վերականգնել էր դեմքը, եւ լավ արդյունք էր ստացվել:  Հենց այդ մասին է բժիշկը պատրաստվում զեկույց կարդալ Հայաստանում ընթացող կոնգրեսում:

Հիշեցնենք, որ Հայաստանում հոկտեմբերի 24-26-ը տեղի է ունենում պլաստիկ վերականգնողական եւ  էսթետիկ  վիրաբուժության միջազգային կոնգրես, որին մասնակցում են հայտնի բժիշկներ ամբողջ աշխարհից: