նախընտրելի դարձնելԵրեւանի Դավիթաշեն վարչական շրջանի 4-րդ թաղամասի թիվ 22, 23 և հարակից բարձրահարկ շենքերի բնակիչները դեմ են իրենց շենքերի հարեւանությամբ իրականացվող կառուցապատմանը. նրանք մտավախություն ունեն, որ կկառուցվի բարձրահարկ շենք, որը անհարմարությունների պատճառ կդառնա:
«Արդեն 15 օր էս շինարարական աշխատանքների դեմ պայքարում ենք: Հստակ չգիտենք՝ով է կառուցապատողը, գիտենք միայն, որ ոչ մի օրինական փաստաթուղթ չունի շինարարություն սկսելու համար: Ասացին, որ ինչ-որ կենտրոն են ուզում կառուցել, բայց մենք չենք հավատում փաստաթուղթ ենք պահանջում»,- NEWS.am-ի հետ զրույցում ասաց բողոքող բնակիչներից մեկը, որը չցանկացավ իր անունը հայտնել:
Բնակիչները պատմեցին, որ օրեր առաջ երկաթյա թիթեղներով ցանկապատված շինհրապարակը խանգարել է հրշեջ ծառայության մեքենային շենքի բակ մտնել:
«Օգոստոսի 6-ին էր, հրշեջ մեքենան եկավ, իրանք ցանկապատել էին արդեն, չկարողացավ մտնել բակ, ստիպված ցանկապատի միջով մտավ, ալյումինե թիթեղները պոկեցին: Դրա համար մենք չենք թողնում, որ շինարարություն սկսեն, ելքն ու մուտքը փակում են»,- պատմեց բնակիչը:
Դավիթաշեն վարչական շրջանի թաղապետ Ռուսլան Բաղդասարյանը NEWS.am-ի հետ զրույցում ասաց, որ ինքը խոսել է բնակիչների հետ, որից հետո միայն թույլատրել շինարարական աշխատանքներ կատարել այդ շենքերի հերեւանությամբ: Նրա խոսքով՝ 4-րդ թաղամասի թիվ 22, 23 և հարակից բարձրահարկ շենքերի ոչ բոլոր բնակիչներն են դեմ շինության կառուցմանը:
Դավիթաշեն վարչական շրջանի ղեկավար Ռուսլան Բաղդասարյանը այսօր հանդիպեց բնակիչների հետ, քանի որ նրանք այսօր կրկին թույլ չէին տվել կառուցապատող ընկերությանը շինարարական աշխատանքներ սկսել:
Հանդիպման ժամանակ բնակիչները թաղապետին ասացին, որ թույլ չեն տա շինարարություն կատարել, մինչեւ իրենց չներկայացնեն այդ շինության էսքիզը, մինչեւ չհասկանան այդ շինությունը խանգարելու է իրենց, թե ոչ։
Բողոքողները ստորագրահավաք կսկսեն, որպեսզի պարզեն, թե ովքեր են շինարարականան աշխատանքներին դեմ եւ ոչ: Ստորագրահավաքի արդյունքները կներկայացնեն վարչական շրջանի ղեկավարին։
