նախընտրելի դարձնելՄայիսի 31–ին շարունակվել է Հայաստանի վարչապետ Նիկոլ Փաշինյանի պաշտոնական այցը Վրաստան։ Օրվա առաջին կեսին Փաշինյանին ընդունել էր Համայն Վրաստանի Կաթողիկոս-Պատրիարք Իլյա Երկրորդը։
Այնուհետեւ վարչապետը տիկնոջ հետ այցելել է «Հովհաննես Թումանյանի տուն» գիտամշակութային կենտրոն։ Նիկոլ Փաշինյանն այցելել է Վրաստանի հայաբնակ վայրեր:
Շարունակում է թեժ մնալ կադրային փոփոխությունների թեման մարզպետների նշանակումների կապակցությամբ։ Արդեն հայտնի են Հայաստանի տաս մարզերից վեցի նոր մարզպետների անունները։ Նրանց նշանակման հարցը ներառված է վաղվա կառավարության նիստի օրակարգում։
Ձերբակալվել են Մասիսի քաղաքապետն ու փոխքաղաքապետը: Նրանք կասկածվում են Էրեբունի վարչական շրջանում ապրիլի 22-ին տեղի ունեցած անկարգությունների ժամանակ քարերով, մահակներով եւ էլեկտրահարող սարքերով երթի մասնակիցներին հարվածներ հասցնելու մեջ:
Մասիսի բնակիչները դուրս են եկել բողոքի ակցիայի՝ ի պաշտպանություն քաղաքի ղեկավարների։
Չեն դադարում կրքերը հանրապետական պատգամավոր Սամվել Ալեքսանյանին պատկանող «Ալեքս Հոլդինգ» ՍՊԸ-ի շուրջ, որտեղ ԱԱԾ լուրջ խախտումներ է հայտնաբերել եւ քրեական գործ հարուցել: Հարկային մեքենայությունների արդյունքում 20 տոկոս ԱԱՀ-ի եւ շահութահարկի փոխարեն վճարվել է ընդամենը 2 տոկոսի չափով շրջանառության հարկ:
Ֆինանսների նախարար Ատոմ Ջանջուղազյանը հստակ պատասխան չտվեց հարցին, թե «Երեւան սիթի»-ի ղեկավարության կողմից նման սխեմաների կիրառումն անօրինակա՞ն է, թե օրենքով է արվել. «Չի կարող օրենքը թույլ տալ 20 տոկոսի փոխարեն 2 տոկոս վճարել: Այլ խնդիր է, որ արդյոք օրենքը թույլ է տվել, որ օգտագործելով սողանքները ամբողջը բաժանես մասերի, որ ավելի քիչ ռիսկեր առաջանան»:
Այսօր դատավոր Արտուշ Գաբրելյանը փոխեց «Սասնա ծռերին» աջակցելու մեջ մեղադրվող Խաչատուր Գիչյանի ու Մանվել Աթոյանի խափանման միջոցը: Խաչատուր Գիչյանի նկատմամբ խափանման միջոցը փոխվեց ստորագրություն չհեռտանալու մասին, իսկ Մանվել Աթոյանի դեպքում խափանման միջոցը փոխվեց 1 միլիոն դրամ գրավ կիրառելու դիմաց:
ԱՄՆ նախագահ Դոնալդ Թրամփն այսօր հանդիպել է Քիմ Քարդաշյանի հետ ու քննարկել բանտային բարեփոխումը։ «Այսօր ես հոյակապ հանդիպում եմ ունեցել Քիմ Քարդաշյանի հետ, զրուցել նրա հետ բանտային բարեփոխումների ու դատավճիռների կայացման մասին»,- գրել է Թրամփը։
Զինեդին Զիդանը հեռացել է Մադրիդի «Ռեալի» գլխավոր մարզիչի պաշտոնից, հայտարարելով, որ այս թիմը պետք է շարունակի հաղթել։ Արքայական ակումբը նա գլխավորել էր 2016թ. հունվարին։
Դոլարի փոխարժեքը նվազել է, եվրոն թանկացել է: Դոլարի փոխարժեքը կազմել է 482.51 դրամ, եվրոն՝ 564.63 դրամ, բրիտանական ֆունտը՝ 643.52 դրամ, իսկ ռուսական ռուբլու փոխարժեքը կազմել է 7.77 դրամ:
Հայաստանի տարբեր մարզերում հունիսի 1-ին սպասվում է անձրեւ եւ ամպրոպ, նաեւ քամու ուժգնացում: Որոշ վայրերում սպասվում է կարկուտ: Երևանում ժամանակ առ ժամանակ կլինի անձրեւ եւ ամպրոպ: Գիշերը մայրաքաղաքում կլինի +13 +15, վաղը կեսօրին՝ +23 +25:
