նախընտրելի դարձնել
Եվրոպացի ֆերմերները ձգտում են ավելացնել իրենց եկամուտները։ Կառավարությունները դժվարանում են բավարարել նրանց պահանջները ու միևնույն ժամանակ պայքարել կլիմայի փոփոխության դեմ։
Եվրոպացի ֆերմերների բողոքի ալիքը շարունակվում է: Վերջին մեկուկես տարվա ընթացքում այն անցել է ԵՄ 15 երկրներով: Ամեն ինչ սկսվեց Նիդերլանդներում՝ ընդդեմ կառավարության պլանների՝ նվազեցնելու ազոտի արտանետումները՝ նվազեցնելով անասունների քանակը, ինչը կարող է հանգեցնել գյուղացիական տնտեսությունների սնանկացման: Այս կարգախոսն այնուհետև ընդունվեց Իռլանդիայի և Բելգիայի գյուղական աշխատողների կողմից: Ռումինիայում և Լեհաստանում նրանք դատապարտում են ուկրաինական հացահատիկի առանց մաքսատուրքերի ներմուծումը, որը խաթարում է տեղական շուկաները: Գերմանիայում գյուղատնտեսության ոլորտը դեմ է 2026 թվականին դիզվառելիքի հարկային արտոնությունների վերացմանը և ԵՄ բնապահպանական չափանիշների ներդրմանը։ Այս հարցում ֆրանսիացիները համակարծիք են գերմանացի գործընկերների հետ։ Թեև դժգոհությունները տարբեր են երկրից երկիր, գրեթե բոլոր ֆերմերները ձգտում են ավելի բարձր եկամուտների և և կլիմայի փոփոխության դեմ պայքարի միջոցների թուլացման։
Այս մասին Euronews-ին տված հարցազրույցում ասաց FarmEurope եվրոպական գյուղատնտեսական արհմիության ներկայացուցիչ Լյուկ Վերնետը. «Շրջակա միջավայրին վերաբերող պահանջները դառնում են ավելի խիստ, բայց միևնույն ժամանակ կտրուկ նվազել է հասարակական աջակցությունը դրա պաշտպանության միջոցներին։ Պարզ հաշվարկը ցույց է տալիս, որ 2003-2023 թվականներին ուղղակի սուբսիդիաների ծավալը նվազել է 37%-ով։ Կառավարության այս օգնությունը ամբողջ Եվրոպայում ֆերմերների միջին եկամտի կեսից ավելին է կազմում»:
ԵՄ գյուղատնտեսության ոլորտում լարվածությունը մեծացել է անդամ երկրների կողմից այսպես կոչված «Կանաչ գործարքի» ընդունումից հետո։ Այն ներառում է, մասնավորապես, «Ֆերմայից՝ պատառաքաղ» ծրագիրը, որը նախատեսված է ոչ միայն եվրոպացիներին թարմ սննդով ապահովելու, այլև բնությանը հասցվող վնասը նվազագույնի հասցնելու համար:
«Ֆերմայից՝ պատառաքաղ»-ն ի սկզբանե մտածված էր որպես ռազմավարություն, որը կբարելավեր մեր արդյունաբերությունը՝ պարտադրելով բարձր որակի չափանիշներ: Ենթադրվում էր, որ պահանջկոտ սպառողներն ավելի շատ կվճարեն մաքուր սննդի համար, բանկիրները կաջակցեն դրա արտադրությանն իրենց էժան փողերով, իսկ ներդրումները կուղղվեն գյուղատնտեսության: Պետք է խոստովանել, որ այսօր այլեւս հնարավոր չէ լուծել այս հավասարումը։ Քաղաքացիները շրջվում են թանկացած ապրանքներից, իսկ օրգանական ոլորտը լուրջ դժվարություններ է ապրում։ Այսօր ավարտվել է էժան կապիտալի շրջանը, որը կարելի էր ներդնել գյուղատնտեսության և անասնաբուծության մեջ։ Այս ամենն այժմ անցյալում է», - ասում է Լյուկ Վերնետը։
Բելգիան, որը նախագահում է Եվրամիությունում, առաջարկում է մոտ ապագայում վերանայել ԵՄ-ի ընդհանուր գյուղատնտեսական քաղաքականությունը։
Բելգիայի գյուղատնտեսության նախարար Դեյվիդ Կլարինվալը նշում է. «Մենք պատրաստվում ենք համեմատական վերլուծություն անել, թե ինչպես է ամեն ինչ դասավորվել անցյալ տարի: Այս վերլուծության արդյունքների հիման վրա մենք կիմանանք, թե որտեղ և գյուղատնտեսական որ պրակտիկաներն էին առավել արդյունավետ: Մենք կշտկենք նաև առանձին երկրներում նկատված թերությունները և կսկսենք ուղղման գործընթացը եվրոպական մակարդակով»։
ԵՄ-ի ընդհանուր գյուղատնտեսական քաղաքականությունը մնում է Միության ծախսերի ամենամեծ միավորը: Ֆերմերները համոզված են, որ այս ոլորտը չի կարելի բերել ազատ շուկայական սկզբունքների վրա։ Անդամ երկրների մարտահրավերն է ճիշտ հավասարակշռություն գտնել իրենց կլիմայական հավակնությունների և տնտեսական իրականության միջև:
