նախընտրելի դարձնելԽորհրդարանական «Հայաստան» խմբակցության պատգամավոր Արթուր Խաչատրյանը «Ուժեղ Հայաստան» կուսակցության առաջնորդ Սամվել Կարապետյանի ձերբակալությունն ու խուզարկությունները կապել է նոր Սահմանադրության քննարկման հետ։ Նրա կարծիքով՝ վարչապետ Նիկոլ Փաշինյանը փորձում է վերացնել ընդդիմությանը՝ կատարելու Ադրբեջանի նախագահ Իլհամ Ալիևի՝ Հայաստանի Հիմնական օրենքը փոխելու պահանջը։
«Ալիևի պահանջը կատարելու համար Նիկոլ Փաշինյանը պետք է վերացնի երկրի ներսում գործող ընդդիմությանը։ Նա խոսում է հանրային ճնշման մասին, և հանկարծ, ինչպիսի՜ զուգադիպություն, մենք տեսնում ենք այս դիմակահանդեսը։ Ես ուղղակի կապ եմ տեսնում այս իրադարձությունների միջև»,- լրագրողներին հայտարարել է Խաչատրյանը Սահմանադրական դատարանի բակում, որտեղ քննարկվում է Կարապետյանի խափանման միջոցի հարցը։
Պատգամավորը նշել է, որ չնայած Փաշինյանի հայտարարություններին, թե Հայաստանի ներքին հարցերը չեն քննարկվում երկրի սահմաններից դուրս, Սահմանադրությունը փոխելու հարցը, իր կարծիքով, արդեն դարձել է Բաքվի հետ բանակցությունների առարկա։
«Հասկանալի է, որ Ադրբեջանն ասում է՝ որպեսզի ես ստորագրեմ այս համաձայնագիրը, Սահմանադրությունը պետք է փոխվի։ Այսինքն՝ Ալիևը Փաշինյանի հետ քննարկել է Սահմանադրությունը փոխելու հարցն արտաքին պարագծում. ես մեջբերում եմ հենց վարչապետին։ Հիմա Նիկոլ Փաշինյանը, որպեսզի կատարի Ալիևի պահանջը կամ նախապայմանը, ինչպես ուզում եք՝ անվանեք, պետք է վերացնի երկրի ներսում գործող ընդդիմությանը»,ժ ասել է Խաչատրյանը։
Մեկնաբանելով Կարապետյանի խափանման միջոցի հնարավոր փոփոխությունը՝ պատգամավորը կասկածի տակ է դրել նման որոշման անհրաժեշտությունը, եթե գործող սահմանափակումների խախտումներ չեն եղել։
«Խափանման միջոցը պատիժ չէ։ Դա անհրաժեշտ միջոց է, որպեսզի անձը չխոչընդոտի նախաքննությանը կամ դատաքննությանը, և որպեսզի գործընթացն արդար ընթանա։ Եթե անձի նկատմամբ արդեն այլ խափանման միջոց է ընտրվել, և որևէ խախտում չի եղել, ի՞նչ իմաստ ունի այն փոխելը»,- հայտարարել է նա։
Խաչատրյանը հավելել է, որ չի հիշում դեպքեր, երբ խափանման միջոցը փոխվել է մեղադրյալի խախտումների բացակայության պայմաններում։
Պատասխանելով խորհրդարանական և արտախորհրդարանական ընդդիմադիր ուժերի հանդիպման մասին հարցին՝ պատգամավորը հայտնել է, որ հանրությունը պատշաճ կերպով կտեղեկացվի դրա բովանդակության մասին։
