նախընտրելի դարձնելՀայաստանի երիտասարդական հիմնադրամը (ՀԵՀ) բուհերում անցկացնում է 1-ին կուրսեցիների կրթաթոշակի մրցույթի իրազեկման ակցիաներ, որպեսզի հնարավորինս շատ ուսանողներ տեղեկացված լինեն եւ դիմեն մրցույթին։
ԵՊՀ պատմության ֆակուլտետում ուսանողները բավականին ակտիվ են, անընդհատ դիմում են դեկանատ, հետաքրքրվում կրթաթոշակի մասին, պահանջում իրենց առաջադիմության թերթիկները: ԵՊՀ պատմության ֆակուլտետի դեկանի տեղակալ Քրիստինե Յախշյանը տեղեկացրեց. «Ուսանողները սպասում են, դիմում, հետաքրքրվում: Մեզ մոտ առավել ակտիվ են ուսանողները, քանի որ մեր ֆակուլտետը հիմնականում համալրված է սոցիալապես անապահով ուսանողներով, եւ անընդհատ երիտասարդները բախվում են ուսման վարձավճարների հայթայթման խնդրի հետ: Ուսանողներն օգտվում են ոչ միայն ՀԵՀ-ի կրթաթոշակից, այլեւ սոցիալական փաթեթներից, ուսանողական վարկերից»:
Երեւանի պետական բժշկական համալսարանի ուսանողական խորհրդարանի նախագահ Կարեն Ակոպյանը տեղեկացրեց, որ բուհի առաջին կուրսեցիները բավականին հետաքրքրված են կրթաթոշակի մրցույթով։ Ուսանողական խորհրդարան դիմում են ոչ միայն բնութագրեր ստանալու, այլեւ մրցույթի մանրամասներին, կարգին, անհրաժեշտ փաստաթղթերի ցանկին ծանոթանալու համար։ Կարեն Ակոպյանն ընդգծեց նաեւ, որ բնութագրեր տրվում են այն ուսանողներին, ովքեր իրոք ցուցաբերել են հասարակական ակտիվություն, ընդ որում, յուրաքանչյուր ուսանողի տրվում է առանձին բնութագիր՝ ըստ նրա կատարած աշխատանքի։
ՀԵՀ կրթաթոշակի մասնակցության պայմաններին բավականին լավատեղյակ էին ուսանողները: Նրանք այդ մասին տեղեկացել էին սոցցանցերից եւ heh.am կայքից: Ոմանք, թեեւ անվճար համակարգում սովորող, տեղեկացել էին կրթաթոշակի մանրամասներին եւ տեղեկությունը տարածել էին ընկերների շրջանում: Մյուսներին պետությունն արդեն աջակցել էր: Սակայն կային նաեւ ուսանողներ, որոնք առանձնապես հույս չունեին, թե որեւէ աջակցություն կստանան, քանի որ ըստ նրանց` «ուսանողների շահերը չեն բարձրաձայնվում»:
