նախընտրելի դարձնելՈստիկանության պարեկապահակային գունդը գրավելու 10-րդ օրը լարված է անցել. գնդի տարածքի մոտ այս գիշեր ոստիկանների կրակոցներից ոտքի վիրավորումներ են ստացել զինված խմբի երկու անդամներ: Տեղի ունեցածի վերաբերյալ առավոտյան հաղորդագրություն է տարածել «Հիմնադիր խորհրդարանը». տարածքին հարակից ոստիկանական պատնեշից «Սասնա ծռեր» խմբի վրա կրակ են բացել, ինչի հետեւանքով են խմբի անդամները վիրավորվել: Ավելի ուշ ոստիկանությունը տեսանյութ հրապարակեց եւ ներկայացրեց կատարվածի մասին իր վարկածը. ժամը 01.00-ի սահմաններում գնդի տարածքից դուրս է եկել ոստիկանության ավտոմեքենա ու շարժվել դեպի արգելապատնեշում կանգնած ոստիկանական շղթան։ Մեքենայի ընթացքը կասեցնելու եւ դրանում գտնվող զինված անձանցից իրական վտանգը կանխելու համար իրավապահ մարմինները կրակ են բացել մեքենայի շարժիչի վրա։ Ի պատասխան՝ հնչել են կրակոցներ:
Աշոտ Պետրոսյանն ու Հովհաննես Հարությունյանը տեղափոխվել են հիվանդանոց: Նրանց վիճակը միջին ծանրության է: Երկուսին էլ մեղադրանք է առաջադրվել, խափանման միջոց է ընտրվել կալանավորումը:
Մինչ ԱԱԾ-ն կոչով զինված խմբի անդամներին է դիմում, ոստիկանությունն էլ նախազգուշացնում է ցուցարարներին փոխել հավաքի վայրը, հակառակ դեպքում, օրենքով սահմանված կարգով կդադարեցնի այդ հավաքը: Ցուցարարները կարծում են՝ ոստիկանությունն այս հայտարարությունն արել է իրավիճակը սրելու համար:
Այսօր առավոտյան մինչ ցուցարարները փորձում էին իրենց հավաքած սնունդը փոխանցեց զինված խմբի անդամներին, «Հիմնադիր խորհրդարանը» հայտարարեց, որ վաղ առավոտյան քաղաքացի Արթուր Սարգսյանն իր անձնական մեքենան ամբողջությամբ բեռնել է սննդով եւ ճեղքելով ոստիկանական արգելապատնեշը, հասել տարածքի մուտքի մոտ: Նրա վրա կրակ են բացել, բայց Արթուրը ոչ մի վնասվածք չի ստացել եւ բարեհաջող կերպով սնունդը տեղ է հասցրել: Ոստիկանության լրատվական ծառայությունն այս առնչությամբ որեւէ պարզաբանում չտվեց, սակայն, Խորենացիում հերթապահություն իրականացնող ոստիկանները պատգամավոր Զարուհի Փոստանջյանին եւ մյուս ցուցարարներին վստահեցրին՝ սննդի հարցը լուծված է:
Արցախում հակառակորդի կրակոցից զոհված Արսեն Առաքելյանը «Տիգրան Մեծ» ռազմամարզական հատուկ վարժարանի սան էր: 19-ամյա զինծառայողը Վանաձոր քաղաքից էր, ընտանիքի ավագ որդին, իրենից փոքր 2 քույր եւ 1 եղբայր ունի: Առաքելյանները սոցիալապես անապահով են, ընտանիքի հայրը 2 տարի առաջ դուրս է եկել տնից եւ չի վերադարձել:
Այսօր ողբերգական դեպք է տեղի ունեցել Երեւանում: 11-ամյա երեխան խեղդվել է ամառանոցային տնակներից մեկի մոտ գտնվող լողավազանում: Հանգամանքները պարզելու համար կատարվում է քննություն:
Մեկ շաբաթվա ընթացքում երկրորդ հայաստանցին է խեղդվել Սեւ ծովում: Հանգստանալու նպատակով Քոբուլեթի մեկնած 66-ամյա Արամ Աբրահամյանը չպարզված հանգամանքներում ջրահեղձվել է այսօր վաղ առավոտյան: Հիշեցնենք, որ հուլիսի 20-ին էլ Աջարիայում խեղդվել էր 40-ամյա Մովսես Առաքելյանը:
Ֆրանսիայի Ռուան քաղաքում այսօր առավոտյան ահաբեկչություն է տեղի ունեցել: Դանակներով զինված երկու երիտասարդ մտել են տեղի եկեղեցի եւ պատանդ վերցրել հոգեւորականին, երկու միանձնուհիների եւ 2 ծխականի: Հոգեւորականը սպանվել է, եւս մեկը ծայրահեղ ծանր վիճակում տեղափոխվել է հիվանդանոց: Ոստիկաններին հաջողվել է վնասազերծել հանցագործներին:
Դեպքի վայր է ժամանել Ֆրանսիայի նախագահ Ֆրանսուա Օլանդը: Նա հայտարարել է, որ եկեղեցու վրա հարձակումն ամենայն հավականությամբ կապ ունի «Իսլամական պետություն» ահաբեկչական խմբավորման հետ: Ավելի ուշ, ԻՊ-ը ստանձնել է պատասխանատվությունը:
Հիշեցնենք, որ սա Ֆրանսիայում այս ամսվա ընթացքում երկրորդ ահաբեկչությունն է: Հուլիսի 14-ին Նիսում տեղի ունեցած ահաբեկչության հետեւանքով սպանվել էր 84 մարդ:
Դոլարն ու եվրոն թանկացել են, ռուբլին ու ֆունտը՝ էժանացել: Դոլարի փոխարժեքը կազմել է 476, ռուբլունը՝ 7.23, եվրոյինը՝ 524, ֆունտինը՝ 624 դրամ:
Երեւանում հուլիսի 27-ին սպասվում է առանց տեղումների եղանակ: Օդի ջերմաստիճանը էապես չի փոխվի: Առաջիկա գիշերը մայրաքաղաքում կլինի +16+18, իսկ վաղը ցերեկը՝ +30+32 աստիճան տաքություն։
