նախընտրելի դարձնելՄեր համոզմամբ տնտեսական կացութաձեւի փոփոխություն չի եղել, համակարգ չի փոխվել եւ այդ պարագայում պետության դերի բարձրացման հետ կապված խնդիր ունենք: Այս մասին ՀՅԴ Գերագույն մարմնի կազմակերպած «ՀՀ սոցիալ-տնտեսական ոլորտի խնդիրները, դրանց լուծման ուղիները» թեմայով քննարկման ժամանակ իր խոսքում նշեց Հայաստանի դեմոկրատական կուսակցության ղեկավար Արամ Գասպարի Սարգսյանը:
«Երկրում չպետք է լիներ մենաշնորհ, օլիգարխիկ կլանային համակարգ, բայց այն ինչ եղել է, արդեն կա: Համակարգային փոփոխությունների համար, մեր կարծիքով, պետք էր մշակել կյանքի որակի ազգային չափորոշիչներ, որը պարտադիր է կառավարության համար: Եթե այդպիսի չափորոշիչներ չունենք, մենք չգիտենք ուր ենք գնում, ինչի ենք գնում:
Հաջորդը, որպեսզի քայլ անենք, պետք էր պետության մեջ իրականացնել առկա ունեցվածքի գույքագրում, հասկանալ՝ ինչ է մնացել: Երրորդ, պետոթյունը պետք է հատուկ պետական ծրագրերի իրականացմամբ ստեղծեր կամ ներդրողներին խրախուսել՝ ստեղծելու նոր տեխնոլոգիաներով հագեցած ձեռնարկությունները: Այստեղ մենք չենք տեսնում, որ պետությունն իր վրա նման պատասխանատվություն վերցնում է»,-ասաց Արամ Սարգսյանը:
Նա հավելեց, որ իրենք ճիշտ են համարում համահայկական բանկի ստեղծումը, նաեւ պետք էր փոքր ու միջին ձեռնարկությունների համար սահմանել հարկային ու վարկային արտոնություններ, վերանայել հարկային քաղաքականությունը:
Նա առաջարկեց, որ այն գործատուները, որոնք իրենց շահույթի 30 տոկոսը կներդնեն նոր բիզնեսներում, նրանց շահութահարկը կնվազի 30 տոկոսով, իսկ եթե շահույթի 80 տոկոսը ներդնի նոր բիզնեսներում, ապա ամբողջությամբ ազատվի շահութահարկից:
